Azərbaycan Xarici İşlər Nazirliyi İspaniya ilə diplomatik əlaqələrin qurulmasının 30 illiyi ilə bağlı bəyanat yayıb. 

Ednews-in xəbərinə görə, bəyanatda qeyd olunub ki, bu ilin fevralın 11-də Azərbaycanla İspaniya arasında diplomatik əlaqələrin qurulmasının 30 illiyi qeyd edilir.

"Ötən 30 il ərzində Azərbaycan və İspaniya arasında qurulmuş dialoq və qarşılıqlı anlaşmaya əsaslanan möhkəm dostluq münasibətləri yüksələn xətt üzrə inkişaf etməkdədir. İki ölkə arasında əməkdaşlıq siyasi, iqtisadi, enerji, mədəniyyət, turizm, humanitar, idman və digər sahələri əhatə edir.

Azərbaycan və İspaniya beynəlxalq hüququn norma və prinsiplərini əsas tutaraq, bir-birilərinin suverenliyi ərazi bütövlüyü və beynəlxalq səviyyədə tanınmış sərhədlərinin toxunulmazlığını dəstəkləyir və hörmət edirlər.

Yüksək səviyyədə həyata keçirilən siyasi dialoq, iki ölkə arasında beynəlxalq və regional təşkilatlar çərçivəsində uğurlu əməkdaşlıq əlaqələrinin daha da inkişafına təkan verir.

İqtisadi, turizm, mədəniyyət və digər sahələrdə əlaqələrin daha da inkişaf etdirilməsi, müqavilə-hüquq bazasının genişləndirilməsi istiqamətində atılan addımlar ölkələrimiz arasında əməkdaşlığın inkişafı üçün yeni əlverişli perspektivlər açır. Hər iki ölkənin parlamentləri arasında yüksək səviyyədə olan əlaqələr ölkələrimiz arasında əməkdaşlığın inkişaf etdirilməsində əhəmiyyətli töhfə verməkdədir.

Azərbaycan və İspaniya arasında diplomatik əlaqələrin qurulmasının 30 illiyi münasibətilə İspaniya hökumətinə və xalqına səmimi təbriklərimizi ifadə edir və ölkələrimiz arasında qarşılıqlı faydalı əməkdaşlığın bundan sonra da uğurla inkişaf edəcəyinə əminliyimizi ifadə edirik", - bəyanatda vurğulanıb. 

Bu gün Azərbaycanla İspaniya arasında diplomatik əlaqələrin qurulmasının 30 ili tamam olur.

Ednews xəbər verir ki, bununla bağlı Azərbaycan Xarici İşlər Nazirliyinin tviter səhifəsində paylaşım edilib.

“Bu münasibətlə İspaniya hökumətinə və xalqına ən xoş arzularımızı göndəririk. Biz əlaqələrimizin daha da güclənməsini gözləyirik”. - paylaşımda bildirilib.