Azərbaycan Ordusunun müddətli həqiqi hərbi xidmətdə olan hərbi qulluqçusu Fərid İsmayılov sosial şəbəkədə yazdığı statusunda xidmət şəraitindən narazılıq etməsi ölkə gündəmini zəbt edib.
Belə ki, işğaldan azad edilmiş rayonlarımızın birində xidmət edən hərbi qulluqçu, jurnalist Fərid İsmayılov ötən gün “feysbuk” səyfəsində paylaşdığı fikirləri ordu daxilindəki problemləri bir daha qabardıb.
F.İsmayılov xidmət keçdiyi hərbi hissənin komanda heyətini rüşvətxorluqda ittiham edir, hərbi hissənin dövlət yox, meşə qanunları ilə idarə olunduğunu, istilik, içməli su, qida problemlərinin olduğunu, onun və digər əsgərlərin sağlamlığına ciddi ziyan dəydiyini bildirib. Fərid həmçinin əsgər və çavuşların odun toplamaq üçün minalı ərazilərə göndərildiyini, pul qarşılığında onların döyüş postlarına çıxarılmadığını da iddia edib. Sonda isə o əsgəri 13 manat aylıq müavinət alan ordunun güclü ola bilməyəcəyini qeyd edib.
Bu problem sosial şəbəkədə geniş yayıldığına görə, dərhal məsələ ilə bağlı Müdafiə Nazirliyinin və Hərbi prokurorluğun mətbuat xidməti ilə əlaqə saxladıq.
Müdafiə Nazirliyindən Fərid İsmayılovun sosial şəbəkələrdə paylaşdığı fikirlərlə bağlı EDNews-un sorğusuna belə cavab verilib:
"İlk olaraq qeyd edək ki, hərbi xidmətdə olan hər bir hərbi qulluqçunun ailə vəziyyəti, sosial statusu, cəmiyyətdə tutduğu mövqeyi və digər amillərdən asılı olmayaraq onlar nizamnamələrin tələblərinə uyğun olaraq xidmət keçir və komandanlıq tərəfindən eyni diqqət və qayğı ilə əhatə olunurlar.
Bildiririk ki, hərbi qulluqçunun məlum müraciətində səsləndirilən fikirlər yalandır, əsassızdır. Bu kimi qeyri adekvat çıxışlar Ordumuzun nüfuzuna xələl gətirmək istəyən qüvvələrin məqsədlərinə xidmət edir.
Sosial şəbəkələr vasitəsilə Ordumuzun xidməti fəaliyyətinə müdaxilə edilməsi cəhdini qəti surətdə pisləyir və belə addımları yolverilməz hesab edirik".
Hərbi prokurorluqdan açıqlama almaq isə mümkün olmayıb.
Milli Məclisin müdafiə, təhlükəsizlik və korrupsiya ilə mübarizə komitəsinin üzvü Aqil Abbas EDNews-a açıqlaması zamanı qeyd edib ki, bu məsələdə bilavasitə Müdafiə Nazirliyi məsuliyyət daşıyır.
“Ümumiyyətlə, çağırışçı əsgər dünyanın heç bir yerində maaş almır. Çağırışçı əsgərə gigiyenik təmizliyini qorumaq, üzünü qırxmaq və s. məqsədilə az miqdarda ödəniş edirlər. Bu bütün dünyada belədir. Sovet dövründə çağırışçı əsgərə təxminən 3 manat 60 qəpik ödəniş edilirdi. İndi 13-15 manatdır. Onlar çağırışçıdır, muzdlu deyil. Harada görülüb çağırışçıya 300-500 AZN pul ödənilsin? Lakin təbii mən də erməni ilə üz-üzə duran əsgərə yüksək maaş verilməsinin tərəfdarıyam.
Qaldı ki, sözügedən hərbi qulluqçunun şikayətinə, sərhəddə, təmas xəttində düşmənlə üz-üzə olan əsgərə xüsusi diqqət göstərmək lazımdır. Onun qida, su, istilik, yataqxana kimi problemləri olmamalıdır. Mən müdafiə komitəsinin üzvü kimi tez-tez işğaldan azad edilmiş ərazilərimizdə yaradılan hərbi hissələrdə oluram. Doğrusu, hansısa ciddi problemlərə rast gəlməmişəm. Lakin bu o demək deyil ki, problemlər yoxdur. Var və çoxdur. Biz bunu DTX-nın Müdafiə Nazirliyinin Maliyyə idarəsində həyata keçirdiyi əməliyyatlardan da gördük. Ona görə də bu kimi problemlərin kökündə Müdafiə Nazirliyi və bu qurumdakı korrupsiya durur”.
Qeyd edək ki, bu il dövlət büdcəsi haqqında qanun layihəsində 2022-ci üçün Azərbaycanda müdafiə və milli təhlükəsizliyin təminatı xərcləri 4 milyard 489 milyon 892,429 min manat (cari məzənnə ilə $2,6 milyarda yaxın) nəzərdə tutulub. Ötən ilsə bu rəqəm 3 milyard 954 milyon manat təşkil edib. Yəni bir il ərzində ölkənin müdafiə xərcləri təqribən bir milyard manat artırılsa da Fərid İsmayılovun xidmət etdiyi Qarabağdakı hərbi hissələrimizin birində içməli su və qida problemi öz həllini tapmayıb.
Azərbaycanda müddətli hərbi qulluqçulara ödənilən aylıq müavinətə gəldikdə isə son 17 il ərzində bu müavinətlər cəmi iki dəfə artırılıb. Yəni, 17 il öncə 20.000 manat olan (6 manat) əsgər müavinəti bu gün 13 manat təşkil edir. Lakin bu illər ərzində ərzaq, siqaret və gigiyenik vasitələrdə müşahidə edilən qiymət artımları nəzərə alınsa əsgər müavinətinin hələ də çox aşağı olduğu qeyd edilə bilər.
Müqayisə üçün deyə bilərik ki, qardaş Türkiyədə sıravi əsgərlərə ödənilən aylıq müavinət təqribən 17-18 manat məbləğindədir. Sərhəd zastavalarında xidmət edən əsgərlərə 140, terrorla mübarizə tədbirlərinin həyata keçirildiyi Cənub-şərqi Anadolu regionunda isə bu məbləğ 306 manat təşkil edir.
Nicat İsmayılov