Dünya Azərbaycanlıları Konqresinin işğaldan azad edilən Şuşa şəhərində Zəfər qurultayının keçirilməsi İranda bəzi dairələri yaman narahat edib.
“Azad İran” teleqram kanalının yaydığı məlumatlara görə, sosial şəbəkələrdə islam qardaşlığından dəm vuran “din qardaşlarımız” Şuşada keçirilən nəinki qurultaya, hətta bu şəhərdə təşkil olunan tədbirlərə və aparılan quruculuq işlərinə qeyz, hikkə ilə yanaşırlar və buna qarşı əks-təbliğat aparmaqdan çəkinmirlər.
Azərbaycanın qələbəsini və uğurlarını həzm edə bilməyən, o cümlədən özünü SEPAH və İran kəşfiyyatına yaxın hesab edən media qurumlarında son zamanlar qurultay ilə bağlı təxribat xarakterli fikirlər yer almaqdadır. Onlar Şuşada guya pantürkistlər, İsrail və Türkiyə casuslarının yığışdığını və İrana qarşı böyük plan hazırlayaraq, müharibə elan etməyə çalışacaqları kimi cəfəng söz-ifadələr işlədirlər.
Hətta bəzi qüvvələr irəli gedərək Zəfər qurultayını təhdid hesab edib İran ordusunu Azərbaycana müdaxilə etməyə çağırıblar.
Məsələ ilə bağlı Ednews-a danışan politoloq Sədrəddin Soltan İran hakimiyyətinin pan-farsizm siyasəti yürütdüyünü qeyd edib.
“İran rejiminin nümayindələri İranda yaşayan azərbaycan türklərinin milli və mədəni hüquqlarının tapdalanmasına göz yumduqlarını yaxşı bilirlər. Dünya Azərbaycanlıları Konqresinin qurultayında İranda etnik azərbaycanlıların hüquqlarının və azadlıqlarının müzakirə mövzusu olması ehtimalı bu ölkənin rəsmilərini narahat etməyə bilməz, çünki İran dünya azərbaycanlılarının vahid həmrəyliyindən qorxur. Onlar bu qurultayda toplanan azərbaycanlıların Cənubi Azərbaycanın dərdini bölüşəcəyini hesab edirlər.
Amma həqiqət onu göstərir ki, əvvəlki qurultaylarda qəbul olunan qətnamə və səsləndirilən bəyanatlarda İrana qarşı heç bir cümlə işlədilməyib".
"Azərbaycanda sionistlərin olması və pantürkistlərin İrana qarşı müharibəyə hazırlaşması kimi absurd fikirlər, sadəcə gülüş doğurur".
Bu sözləri Ednews –a Milli.az saytının baş redaktoru Elçin Alıoğlu bildirib. O, Şuşa qurultayının hər hansı bir dövlətə qarşı yönəlməsini qeyri-mümkün hesab edib.
“İranda mühafizəkarlara bağlı olan media qurumları İran-Azərbaycan əlaqələrinin inkişafında maraqlı deyillər. Onlar Azərbaycanın əldə etdiyi uğurlara ikrah hissi ilə yanaşırlar. Həmin qüvvələr Azərbaycanın İran ilə strateji tərəfdaş olduğunu, bu iki ölkənin regionda bircə mühüm iqtisadi və tikinti layihələri həyata keçirdiyini nəzərə almalıdırlar. İki qonşu ölkə arasında münasibətləri korlaya bilməzlər”.
İranın 44 günlük Vətən müharibəsində din qardaşının düşməni Ermənistanın yanında yer aldığını deyən Azərbaycan Milli Dirçəliş Partiyasının sədri Fərəc Quliyev İslam rejiminin 30 milyon Azərbaycan türkünü milli və mədəni hüquqlarından məhrum etdiyi barədə söz açıb.
“İran həmişə ölkəmizə qarşı qərəzli münasibət bəsləyib. Biz buna Qarabağ müharibəsində şahidi olmuşuq. İranda bir dənə də olsun azərbaycan dilində məktəb yoxdur. Soydaşlarımıza öz ana dillərində tədris mərkəzləri və nəşriyyat açmaq imkanları verilmir. Bütün haqları əllərindən alınmaqla bərabər, onlara qarşı repressiyalar tətbiq olunur. Tehran dünya azərbaycanlılarının bu məsələləri qurultayda gündəmə gətirəcəyindən qorxur”.
Fərəc Quliyev Azərbaycanın Qarabağda müharibə apardığı dövrdə İranın Ermənistana açıq və gizli şəkildə silah-sursat ötürdüyü, müharibədən sonra Azərbaycanla sərhəd ərazilərdə erməni silahlı birləşmələrinə təlimlər keçirdiyini də dilə gətirib.
Azərbaycan Milli Azadlıq Hərəkatının rəhbərlərdən biri olan, Milli Dövlətçilik Partiyasının sədri Nemət Pənahlı İranın Azərbaycana qarşı təbliğatlarına daha kəskin ifadələr səsləndirib.
“Azərbaycanın güclənməsi və dünya azərbaycanlılarının bir yumruq kimi birləşməsi və bir-birlərinə həmrəy olması İranda Azərbaycan türklərinin azadlıq hərəkatına çox böyük təsiri olacaq. Gez-tez cənublu soydaşlarımız öz milli haqları və azadlıqları uğrunda mübarizəyə əl ataraq İranın imperalist dövrünə son qoyacaqlar. Cənubi Azərbaycan onsuzda öz azadlığına və müstəqilliyinə qovuşacaq. İran qonşuluğunda müstəqilliyinə qovuşan dövlətin olduğunu yaxşı bilir”.
Yunis Abdullayev