“İqtisadi Əməkdşalıq Təşkilatının mayın 17-də keçirilən konfransın yekunu kimi Bakı Bəyannaməsi imzalandı. Bu sənədin müddəları təşkilat üzvlərinin bölgədə iqtisadi və sosial inkişafın təmin edilməsində, inteqrasiya tədbirlərinin inkişafında parlamentlərin rolunu daha da gücləndirmək əzmində olduqlarını bir daha nümayiş etdirir”.
Ednews xəbər verir ki, bu fikirləri parlamentin spikeri Sahibə Qafarova Milli Məclisin bu gün keçirilən plenar iclasında səsləndirib.
İqtisadi Əməkdşalıq Təşkilatının mayın 17-də keçirilən konfransı ilə bağlı fikirlərini bölüşən spiker qeyd edib ki, Bəyannamədə 44 günlük Vətən müharibəsində qələbəsi münasibətilə Azərbaycana təbrik ünvanlanıb:
“Eləcə də, bu qələbənin regionda sülh və tərəqqiyə yol açacağı qeyd olunur. Azərbaycan hökumətinin işğaldan azad edilmiş ərazilərdə gördüyü yenidənqurma və minatəmizləmə işlərinə dəstəyin göstərilməsinə çağırış səsləndirilir. Bakı Bəyannaməsinin mühüm məqamlarından biri də Şərq-Qərb və Şimal-Cənub dəhlizinin mühüm tərkib hissəsi olacaq, nəqliyyat infrastrukturu olan Zəngəzur dəhlizinə güclü dəstəyin ifadə olunmasıdır”.