Rusiyanın Xarici İşlər Naziri Sergey Lavrov ötən gün İrəvana səfər edib. Lavrovun Türkiyə səfərindən dərhal sonra Ermənistana gəlməsi siyasi aləmdə maraq doğurub. Ekspertlərin fikrincə, Ankara səfərinin ardınca Lavrovun İrəvana gəlməsi birdən-birə baş verməyib. Bu əvvəlcədən nəzərdə tutulmuş səfərdir.
Erməni həmkarı Ararat Mirzoyanla görüşən Lavrov Azərbaycan və Ermənistan arasında münasibətlərin nizamlanmasına dair mümkün sənədi müzakirə ediblər. Eyni zamanda XİN başçıları Qarabağ məsələsi ilə bağlı fikir mübadiləsi aparıblar.
Politoloq Tofiq Abbasov məsələni şərh edərkən bildirib ki, Rusiya hər hansı hərbi-siyasi kampaniyanın aparıcı qüvvəsi kimi çıxış edirsə, bu o demək deyil ki, digər bölgələrdəki maraqlarını ikinci, üçüncü və ya arxa plana keçir. O, bu barədə Ednews-a açıqlaması zamanı bildirib.
“Son vaxtlar Ukrayna hadisələri ətrafında aparılan hərbi-siyasi kampaniya ilə bağlı fikirlər haçalansa da Rusiyanın fövqəldövlət kimi Avrasiyada maraqları olduğunu nəzərə almaq lazımdır. Eyni zamanda Suriyada Türkiyənin əməliyyat keçirmək istəyi Rusiya tərəfindən birmənalı qarşılanmadı və Lavrov ora yollandı. Onun Çavuşoğlu ilə söhbətində bəlli oldu ki, Rusiyanın təkidi ilə Türkiyə planlaşdırdığı əməliyyatı təxirə salıb və bəlkə də vaz keçib. Bu baxımdan Türkiyədən gələrkən yolüstü Ermənistana səfər etməsi və Mirzoyanla görüşü də gözlənilməz və ya təsadüfi deyil”.
Politoloq vurğulayıb ki, xüsusilə də hazırda Rusiyanın Zəngəzur dəhlizinin açılmasında böyük marağı var.
“Çünki Avropa istiqamətində bütün yük daşımaları dayanıb. Rusiyanın özünə alternativlər lazımdır. Biz Ermənistan istəsə də, istəməsə də İran İslam Respublikası ilə alternativ variantı tapmışıq və bu layihəni həyata keçirəcəyik. Bu baxımdan Rusiya Ermənistana təzyiq göstərə bilər. Rusiyanın da marağındadır ki, Azərbaycanla bağlı baxışlar haçalanmasın və ümumi şərait, konfiqurasiya ümidverici olsun”.
T. Abbasov onu da əlavə edib ki, Rusiya indi daha çox geosiyasi proseslərin gedişatına öz münasibətini bildirirsə, Avropa ilk növbədə geoiqtisadi proseslərin səngiməməsində və dəhlizlərin işləməsində maraqlıdır.
“Avropa İttifaqı Azərbaycanı çox vacib tərəfdaş kimi dəyərləndirir, həm də onun üçün Orta Asiyaya qapılar açdığını bilir. Ona görə də hazırda bölgəmizdə sabitliyin olması və güclənməsi bütün tərəflərin marağındadır”.
Gülnar Səlimova
