“Avropa İttifaqı diplomatının Çinə qarşı sanksiyaların tətbiqi məsələsi ilə bağlı bəyanatı Çin-Avropa münasibətlərində siyasi soyumağa və radikallaşmaya səbəb olacaq”.
Bu barədə Ednews-a sabiq diplomat, politoloq Fikrət Sadıqov deyib. Siyasi analitikin sözlərinə görə, Avropa İttifaqı ABŞ-ın Çinə qarşı mövqeyini dəstəkləyir və buna görə də avropalı səfirin belə bəyanatı təəccüblü deyil.
“Ancaq burada bu məhdudiyyətlərin effektivliyinə diqqət yetirmək lazımdır. Bu an çox vacibdir. Çin beynəlxalq münasibətlər sistemində kifayət qədər siyasi çəkiyə malik əsas beynəlxalq oyunçudur. Digər tərəfdən, bu ölkə yüksək məhsuldarlığa malikdir, böyük miqdarda mal ixrac və idxal edir. “Köhnə dünya” ölkələrinin əksəriyyəti Çin mallarından asılıdır. Bu məsələdə bir çox detallar var ki, onları daha konstruktiv və ətraflı öyrənmək lazımdır”, - deyə politoloq vurğulayıb.
O, həmçinin qeyd edib ki, Aİ-nin avropalı diplomatının Çinə qarşı sanksiyaların tətbiqi ilə bağlı bəyanatı Çin-Avropa münasibətlərində siyasi soyuqluq və radikallaşmaya səbəb olacaq.
“Çin üçün Tayvan məsələsi çox önəmlidir, bu, Çinin ərazi bütövlüyü və separatizmlə mübarizə məsələsidir. Pekin bu məsələyə çox həssas yanaşır. Üstəlik, Çin dövləti ABŞ və Aİ ilə daha kəskin eskalasiyaya gedə bilər”, -, deyə keçmiş diplomat vurğulayıb.
F.Sadıqovun fikrincə, Avropanın Çinə qarşı sanksiyalarının tətbiqi onun Rusiya ilə yaxınlaşması üçün siyasi platforma yaradacaq.
“Gələcəkdə bu sanksiyaların sərtləşdirilməsi prosesi Rusiya Federasiyası ilə Çin arasında hərbi əməkdaşlığın dərinləşməsinə gətirib çıxara bilər. Qərbin hazırkı mövqeyi Pekin və Moskvanın yaxınlaşmasına daha da kömək edəcək. Ukraynada müharibə başlayanda Çin bu məsələdə bərabər məsafəli və neytral mövqe tutub. Lakin Qərbin bugünkü “siyasi oyunu”, xüsusən də ABŞ Konqresinin Nümayəndələr Palatasının sədri Nensi Pelosinin Tayvana səfəri onu deməyə əsas verir ki, bu cür hərəkətlər ABŞ və Qərbin Çindən uzaqlaşmasına gətirib çıxara bilər ki, bu da Rusiya ilə yaxınlaşmaq üçün əlverişli şərait yaradacaq. Bu gün belə bir siyasi mənzərə rəsmi Moskvanın "əlində oynayır", çünki Ukraynadakı müharibə Rusiyanın ən mühüm tərəfdaşlarını itirməsinə səbəb olub. Bu baxımdan Pekin kimi müttəfiqin olması Moskva üçün sərfəlidir, - deyə həmsöhbətimiz sözlərini yekunlaşdırıb.
Xaliq Quliyev