“Qarabağ ermənilərinin yeganə çıxış yolu Azərbaycan vətəndaşlığını qəbul etmək və qanunlarımızı tanımaqdır”.
Bu sözləri Ednews-a açıqlamasında Milli Məclisin deputatı, İnsan hüquqları komitəsinin üzvü Elşad Mirbəşiroğlu Ermənistanda və sülhməramlıların nəzarətində olan ərazilərdə Azərbaycan vətəndaşlığını qəbul etmək üçün müraciət edən ermənilərin təqiblərə məruz qalmasını şərh edərkən bildirib.
Deputatın sözlərinə görə, Azərbaycanda etnik mənsubiyyətindən asılı olmayaraq hər bir şəxs qanunlar çərçivəsində öz hüquqlarını həyata keçirmək imkanına malikdirlər.
“Ümumiyyətlə, Qarabağ ermənilərinin vətəndaşlıq mənsubiyyəti olmadan Azərbaycan ərazisində yerləşməsi və yaşaması qeyri-qanuni olardı. Hazırda ərazimizdə yaşayan ermənilər vaxtı ilə Azərbaycan SSRİ-nin vətəndaşları olublar. Bu danılmaz faktdır. Azərbaycan müstəqil olduqdan sonra ölkəmizin ərazində daimi yaşayan bütün şəxslər Azərbaycan passportu ilə təmin olunub. Eyni qanun ölkəmizdə yaşamaq istəyən ermənilərə də şamil olunmalıdır. Onların əllərində Azərbaycan vətəndaşlığını sübut edən rəsmi sənəd olmalıdır. Bu bizim üçün ona görə vacibdir ki, ölkəmizin istənilən bölgəsində hamı qanuni əsaslarla yaşasınlar və həyatını sürdürsünlar. Eyni zamanda Qarabağ ermənilərinin Azərbaycan passportu ilə təmin olunması ölkəmizin suverenliyi və təhlükəsizliyi baxımından da önəmlidir. Bu separatizimin kökünün kəsilməsi üçün ən təsirli və münasib vasitə ola bilər”.
Elşad Mirbəşiroğlu hesab edir ki, Azərbaycan vətəndaşlığını almaq istəyən ermənilərə qarşı hər hansı təqiblərin təsdiq olunması üçün, daha doğrusu bu kimi məsələlərin beynəlxalq instansiya məhkəmlərində araşdırılmasını məsləhət bilib.
“Təkcə bizim ölkə daxilində yox, həmçinin beynəlxalq səviyyədə insan hüquqları ilə məşğul olan institutlar bu məsələlər üzərində tədqiqat işləri aparmalıdır. Onların hədə-qorxular, təqiblərlə üzləşməsi ilə bağlı hallar mütləq araşdırılmalıdır. Ondan sonra müəyyən nəticəni ortalığa qoymaq olar”.
Qeyd edək ki, Azərbaycanda insan hüquqları ilə məşğul olan QHT-lər Ermənistanda və Qarabağda Azərbaycan vətəndaşlığını almaq üçün müraciət edən ermənilərin hüquq-mühafizə orqanları tərəfindən təqiblərə məruz qalması və incidilməsi ilə bağlı beynəlxalq təşkilatlara müraciət edib.
Yunis Abdullayev
