Şuşaya səfər edən Azərbaycanda rezident əsasda akkreditə olunmuş diplomatik korpusun nümayəndələri Əhmədbəyli-Füzuli-Şuşa avtomobil yolu üzərində tikintisi başa çatmaqda olan tunelə baxış keçiriblər.
Ednews APA-ya istinadən xəbər verir ki, Azərbaycan Respublikası Prezidentinin Şuşa rayonunda xüsusi nümayəndəsi Aydın Kərimov və Azərbaycan Avtomobil Yolları Dövlət Agentliyinin nümayəndəsi Əyyub Hüseynov tunelin tikintisi barədə qonaqları məlumatlandırıb.
Əyyub Hüseynov bildirib ki, hazırda Füzulidən Şuşaya məsafə ənənəvi yolla 1 saatdırsa tunellər tamamlandıqdan sonra bu müddət təxminən 20 dəqiqə olacaq.
AYDA-nın əməkdaşı deyib ki, tunelin uzunluğu 6.5km olacaq. O əlavə edib ki, Kəlbəcər istiqamətində də tunelin çəkilişi davam edir vəonun uzunluğu 11.6 km təşkil edəcək.
Daha sonra Azərbaycan Prezidentinin köməkçisi Hikmət Hacıyev diplomatlara Laçın koridoru barədə məlumat verib.
O deyib ki, Azərbaycan, Ermənistan və Rusiya arasında 2020-ci ilin noyabrında imzalanmış sənədə əsasən, Azərbaycan Laçın koridoruna alternativ olan 32 km-lik yolun öz ərazisinə düşən 22 kml-lik hissəsini qısa müddətdə tamamlasa da, Ermənistan yolun qalan hissəsinin çəkilişinə yeni başlayıb.
O həmçinin Zəngəzur koridoru barədə danışıb, deyib ki, bu, yalnız Azərbaycan üçün deyil bütövlükdə region üçün önəmli layihədir.
Hikmət Hacıyev əlavə edib ki, bu ayın sonunda Azərbaycan və Ermənistan Baş nazirləri müavinlərinin Moskavadakı görüşündə Zəngəzur koridorunun açılması ilə bağlı məsələlər müzakirə olunacaq. O vurğulayıb ki, belə layihələr regionda dayanıqlı sülhə təkan verəcək.