“Əslində Xerson əhalisinin öz doğma torpaqlarından başqa yerə köçürülmələri bəlkə də daha acı faciələrin başlanğıcı ola bilər. Bunu dünya mediasının Ukraynanın Xersonu geri alması fikri kimi təqdim etməsi ilə razılaşmıram”.
Bu sözləri AĞ Partiya sözçüsü, siyasi şərhçi Cavanşir Abbaslı Ednews-a açıqlamasında bildirib. O, qeyd edib ki, bu yerdəyişmə “Kutuzov” planının bir hissəsi ola bilər.
“Ola bilsin ki, Ukrayna ordusu o yerlərin bir qismini geri qaytarmağa nail olsun. Amma bütövlükdə Xersonu alacağı yaxın gələcəkdə real görünmür. Rusiya tərəfinin Xersona güclü zərbələr endirmək üçün bu taktikaya əl atması ehtimalını istisna etmək olmaz. Əhalinin oradan çıxarılması rus sərkərdəsi Kutuzovun 1812-ci ildə Napoleonun 700 minlik ordusuna qalib gəlmək üçün irəli sürdüyü taktikanı xatırladır. Belə ki, o, mülki əhalinin həlak olmasının qrşısını almaq üçün Moskvadan bütövlükdə insanları çıxarmışdı. Bundan sonra sərkərdə qəsdən şəhərə od vurub yandırtmış, döyüşsüz indiki Rusiya paytaxtını fransızlara təslim etmişdi. Bunun nəticəsində Napoleonun ordusu aclıqdan, soyuqdan və xəstəlikdən qırılmağa başlayır. Bundan sonra isə Napoleon geri çəkilməyə məcbur qalır. Hətta bu məğlubiyyət onun hakimiyyətinin sonunu gətirən proseslərin başlanğıcı kimi də hesab olunur”.
Sonda C.Abbaslı qeyd edib ki, Xersonun müdafiəsi üçün Rus ordusunun Ukrayna hərbi birləşmələrinə sərt zərbələr endirəcəyi proqnozlaşdırılır.
“Əgər Xerson alınarsa, bu ümumi Rusiya-Ukrayna savaşında geridönüşün başlanğıcı ola bilər. Bu baxımdan nüvəsi ilə bütün dünyanı səksəkədə saxlayan Putin Xersonu itirsə, nüvə silahına əl ata bilər”.