“Almaniya Cənub-Şərqi Asiyadakı tərəfdaşları ilə əməkdaşlığı gücləndirməkdə maraqlıdır”.

Ednews Deutsche Welle-ə istinadən xəbər verir ki, bu sözləri Almaniyanın kansleri Olaf Şoltz Sinqapurda biznes liderləri ilə görüşündə bildirib.

Bununla bağlı, Almaniyanın dövlət rəhbəri Rusiyanın Ukraynaya təcavüzü və qlobal gücə çevrilən Çinin geosiyasi vəziyyəti barədə fikirlərini bildirib.

“Əməkdaşlığın dərinləşməsi çox vacibdir, çünki biz hamımız hiss edirik ki, ayaqlarımızın altında mövcud olan geosiyasi zəmin dəyişir”, – deyə Şoltz deyib.

O, regionun ölkələrini əmin edib ki, Almaniyanın Rusiyanın təcavüzünə qarşı Ukraynaya verdiyi dəstək analoji təhlükələrlə üzləşə biləcək digər ölkələrə də şamil olunacaq.

“Heç bir ölkə başqasının arxa bağçası deyil. Asiya-Sakit Okean regionu Çindən qat-qat böyük əraziyə malikdir”.

Bununla yanaşı, Sinqapura səfər edən Almaniya kansleri bu ölkənin baş naziri Li Hsien Lonq ilə iqlimin qorunması, təhlükəsizlik, rəqəmsal inkişaf və innovasiya sahələrində birgə fəaliyyətlə bağlı bəyannamə imzalayıb.

İmza mərasimindən sonra Li Hsein alman istehsalı sualtı qayıqların alışını müzakirə etmək üçün gələn Almaniyaya səfər edəcəyini bildirib. Berlin də öz növbəsində Sinqapurun enerji sahələrinə sərmaye qoymaq niyyətində olduğunu diqqətə çatdırıb. 

Yunis Abdullayev