“İsraildə səfirlik və Fələstində diplomatik nümayindəlik açılması ilə bağlı qərar düzgün və rasional diplomatik siyasətimizdən irəli gəlir”.
Bu sözləri Ednews – a açıqlamasında politoloq İlyas Hüseynov bildirib. Söhbət zamanı, politoloq Azərbaycanın İsraildə səfirlik açmasını böyük uğur kimi qiymətləndirib.
“Bildiyimiz kimi, İsrailin əsas neft təzcihatçısı Azərbaycandır. Bakı və Təl-Əviv arasında siyasi, mədəni və humanitar sahələrdə münasibətlər xüsusi təqdirəlayiqdir. Eyni zamanda iki dövlət ikitərəfli hərbi əlaqələrin inkişafında mühüm addımlar atıblar. İstər 2016- ci ilin Aprel döyüşləri, istərsə 2020-ci ildə Vətən müharibəsində İsrailin pilotsuz uçuş aparatları, hava hücumundan müdafiə sistemləri və silahlanmaya qəbul edilən digər silahlar özünü doğrultmuş və müasir standatlara cavab verib. İsrail silahlarının Azərbaycanın erməni işğalçıları üzərində qələbəsində rolu əvəzsizdir”.
Politoqun sözlərinə görə, Azərbaycanın müstəqillikdən bəri İsraildə səfirlik açmamasının ən böyük səbəbi məhz İrandır.
“Son dövrlədə İran və Azərbaycan arasında münasibətlərin kəskinləşməsi, xüsusilə bunun İran tərəfindən daha kəskinləşdirilməsi Bakını Tehranla münasibətlərə yenidən baxmasına vadar eləyib. İran ordusu artıq iki dəfə Azərbaycanla sərhəd ərazilərdə təxribatyönümlü hərbi təlimlər həyata keçirib. Azərbaycanın İsraildə səfirlik açmasının səbəbi məhz bu idi”.
İlyas Hüseynov, həmçinin bildirib ki, Azərbaycanın Fələstində diplomatik nümayindəlik açması çox mühüm addımdır.
“Azərbaycan bərabərhüquqlu prinsiplər əsasında öz xarici və regional siyasətini formalaşdırıb. Azərbaycan ərəb dünayası ilə çox sıx bağlıdır. Azərbaycan həqiqətlərinin dünya ictimaiyyətinə çatdırılmasında ərəb mediası əhəmiyyətli və fəal rol oynayıb. Bu baxımdan Fələstində diplomatik nümayindəliyin açılması ilə bağlı qərar da təqdirəlayiq hesab olunmalıdır. Yaxın zamanda İsrail və Fələstinlə ikitərəfli münasibətlər və təmaslar diplomatik kanallar vasitəsi ilə daha da yüksək səviyyə qalxacaq”.
Yunis Abdullayev