28 noyabr 2022-ci il tarixində Hindistanın paytaxtı Nyu Dehlidə Hindistan və Azərbaycan Xarici İşlər Nazirlikləri arasında məsləhətləşmələrin beşinci raundu baş tutub.
Ednews xəbər verir ki, məsləhətləşmələrdə Hindistan nümayəndə heyətinə Hindistan Xarici İşlər Nazirliyinin Qərb istiqaməti üzrə Katibi cənab Sancay Verma başçılıq edib.
Azərbaycanın Xarici İşlər Nazirinin müavini Zati-aliləri cənab Elnur Məmmədov Azərbaycan nümayəndə heyətinə rəhbərlik edib.
Xarici İşlər Nazirlikləri arasında məsləhətləşmələrin dördüncü raundu 28 iyul 2016-cı il tarixində keçirilib.
Tərəflər Hindistan-Azərbaycan ikitərəfli münasibətlərini, o cümlədən siyasi, ticarət-iqtisadi, konsulluq, mədəniyyət və təhsil məsələlərini nəzərdən keçiriblər. Regional məsələlər, BMT və digər çoxtərəfli qurumlar çərçivəsində əməkdaşlıq haqqında da fikir mübadiləsi aparılıb.
Bu il Hindistan və Azərbaycan diplomatik əlaqələrin qurulmasının 30 illiyini qeyd edilir. Qeyd edək ki, Hindistan 1991-ci ildə Azərbaycanın müstəqilliyini tanıyan ilk dövlətlərdən biri olub.
İki ölkə müxtəlif sahələrdə, xüsusilə ticarət, kommersiya və enerji sektorunda əməkdaşlığı uğurla şaxələndirib. Ölkələr arasında ikitərəfli ticarət dəfələrlə artıb və bu gün təxminən 1 milyard ABŞ dolları təşkil edir.
Hazırda Azərbaycan Hindistan üçün mühüm xam neft tədarükçüsünə çevrilir. "ONGC Videsh Limited" şirkəti Azərbaycanın karbohidrogen sektorunda əhəmiyyətli maraqlara malikdir.
