Milli Məclisin deputatı Qüdrət Həsənquliyev ölkəmizin adını Şimali Azərbaycan Respublikası ilə əvəz edilməsini təklif edib.
“Ölkəmizin adı Şimali Azərbaycan olmalıdır. Necə ki, bölünmüş digər xalqların adında Şimali və Cənubi ifadəsi var. Düşünürəm ki, bu həm də Cənubi azərbaycanlılar üçün stimul ola bilər”.
Məsələ ilə bağlı Ednews-a danışan tarixçi Faiq Ələkbərov Azərbaycan Respublikasının adına şimal sözünün əlavə edilməsini doğru hesab etmədiyini deyib. Onun sözlərinə görə, 1918-ci ildə əsası qoyulan Azərbaycan Xalq Cümhuriyyətinin adında əsas mahiyyət bütün Azərbaycanın birləşdirilməsi idi.
“Həmin dövrdə İranda Qacar hakimiyyətini zəbt edən milliyətçi qüvvələr Azərbaycan sözünü qəbul edə bilmirdilər. Onlar Xalq Cümhuriyyətini Şimali Azərbaycan adlandırılmasını təklif edirdilər. Onlar hesab edirdilər ki, şimalda yeni yaradılan dövlət Təbrizə və azərbaycanlıların yaşadığı digər ərazilərə də iddia qaldıra bilər. Azərbaycan sözü şimal və cənubda yaşayan bütün azərbaycanlılara şamil olunub. Şimal Azərbaycan sözü azərbaycanlıların coğrafi cəhətdən məhdudlaşdırılması anlamına gəlir.
Cənubi Azərbaycanda yaşayan soydaşlarımız nə vaxtsa öz dövlətini qurmağa nail olsalar, onda bu dövlət Güney Azərbaycan adlana bilər. Bu ayrı bir məsələdir. Lakin bu gün adımızın Azərbaycan Respublikas kimi qalmasını daha məqbul hesab edirəm və bu bizim üçün daha doğru addım ola bilər. Çünki bu cənubda yaşayan soydaşlarımıza imkan yaradır ki, özlərini dövlətimizin bir parçası hesab etsinlər, eləcə də gələcəkdə öz dövlətini yaradıb Azərbaycan Respublikası ilə birləşsinlər”.
Güneyli fəal, Azərbaycan Mərkəzi Partiyasının üzvü Elyar Kamrani həmkarından fərqli olaraq millət vəkilinin fikirlərini dəstəkləyib.
“Neçə il bundan əvvəl bu məsələni gündəmə gətirərək ətraflı müzakirələr aparmışdıq. Hesab edirəm ki, Azərbaycan Respublikasının Şimali Azərbaycan Respublikası ilə siyasi və tarixi cəhətdən daha doğru addım olar. Ona görə ki, biz azərbaycanlıların vətəni məcburən iki yerə bölünüb. Bir-birimizin həsrətində yaşayırıq. Gec olmadan Şimali Azərbaycan Respublikasını elan etmək lazımdır. Bu həm şimal, həm də cənubda yaşayan soydaşlarımızda bütöv bir Azərbaycan anlayışı yaradacaq. İkincisi, Cənubi Azərbaycanın varlığı və müstəqil coğrafiya olması daha aydın hiss olunacaq. Ondan sonra zaman şəraitində şimallı və cənublu soydaşlarımız bütöv bir dövlət halında birləşmək istiqamətində qərar verəcək”.
Yunis Abdullayev