“İranda baş verən hadisələrə etiraz deyil, inqilab adı qoymuşuq. Çünki orada olan hadisələr ölkənin bütün şəhərlərini, kəndlərini, rayonlarını əhatə edir. Milli mənsubiyyətindən asılı olmayaraq bütün xalqlar artıq molla rejiminə qarşı etirazlarını bildirirlər”.

Bu sözləri Ednews-a Azərbaycan Yazıçılar Birliyinin Güney Azərbaycan şöbəsinin rəhbəri, şair Sayman Aruz İranda baş verən hadisələrə fikir bildirərkən deyib. O, qeyd edib ki, İranda heç bir xalqın milli, mədəni və mənəvi haqqı rəsmiyyətə tanınmır. Təbii ki, buna etiraz edən digər xalqlar da axırda gəlib bu möhtəşəm inqilabın əsasını qoydular.

S.Aruz Cənubi azərbaycanlıların azadlıqlarına qovuşa biləcəyi barəsində də danışıb:

“Cənubu azərbaycanlılar da baş verən qanundan kənar deyillər. Yüz illər boyu biz orada bir çox inqilabların yaradanı və başlandığı nöqtə olmuşuq. Səttərxandan bu günə qədər 5 inqilabın yaradanı olmuşuq. Biz bu günkü İranda baş verən inqilabları əslində bəhs etdiyim inqiabların davamı hesab edə bilərik. İnanıram ki, hadisələr Cənubi Azərbaycanın müstəqilliyinə mütləq çatacaqdır. Gün olacaq ki, Azərbaycan o taylı, bu taylı vahid dövlət, vahid bayraq və vahid siyasi sistem ətrafında birləşəcək”.

Güneyli şair İranın Ermənistana dəstək olmasından da söz açıb:

“Ermənistanla İranın yaxınlığından danışsam, onlar dini və ideoloji baxımdan bənzərlikləri olmayan dövlətlər olsa da, alt qatda hər ikisi eyni mənbəyə, mərkəzə xidmət edirlər. Üzü Hindistandan, İrandan, Ermənistandan Rusiyaya qədər uzanan anti-türk təfəkkürü onları bu gün birləşdirir. Biz bunu elə də təəccüblə qarşılamamalıyıq. İran erməni lobbisinə, terror təşkilatlarına məğlub olub. İran terror təşkilatlarına dolayı yollarla dəstək verən ölkədir”.

O, söhbət əsnasında Azərbaycanla İranın diplomatik həll yolu tapa biləcəklərinə inanmadığını vurğulayıb.

“İranla heç bir formada diplomatik həllimiz yoxdur. Çünki Cənubi Azərbaycanda soydaşlarımız müqəddaratlarını həll etmək üçün meydandadırlar və evə getmək niyyətləri yoxdur. Ona görə də heç bir diplomatik həlldən söhbət belə gedə bilməz. Yalnız bu halda ola bilər ki, İran Azərbaycanın şərtlərini qəbul etsin. O şərtlər də budur ki, Azərbaycanın tarixi topraqlarındakı hakimiyyətini tanısın. Zəngəzur dəhlizinin açılması qarşısında yaratdığı bütün maneələri aradan qaldırsın. Eyni zamanda Azərbaycan Prezidenti İlham Əliyevin Cənubi azərbaycanlılar haqda söylədiyi bütün tələbləri və şərtləri qəbul etsin. Cənubi azərbaycanlıların ana dilində təhsilini versin, milli-mədəni dəyərlərini, həqiqətlərini tanısın. İran da sözsüz ki, bu şərtləri qəbul etməyəcək. Bu da İranın dağılmasına gətirib çıxardacaq. Molla rejimi artıq geri dönüşü olmayan bir yoldadır. Gələcəkdə inanıram ki, Azərbaycan xalqı Cənubi Qafqazın və Orta Asiyanın aparıcı qüvvəsinə çevriləcəkdir”.

Oğuz Ayvaz