Dekabrın 5-də Moskvada Azərbaycanın Xarici İşlər naziri Ceyhun Bayramov və Rusiya Federasiyasının XİN başçısı Sergey Lavrov arasında görüş keçirilib. Görüşdə Azərbaycan və Rusiya Federasiyası arasında 2023-2024-cü illər üzrə XİN-lərarası məsləhətləşmələr planı imzalanıb.
Məsələ ilə bağlı Ednews-a danışan Azərbaycan-Rusiya parlamentlərarası əlaqələr üzrə işçi qrupu üzvü, deputat Azər Badamovun sözlərinə görə, məsləhətləşmələr planı qarşıdan gələn iki ildə nazirliklər arası görüşlərin və tədbirlərin iş planı müzakirə olunub:
“5 dekabrda Azərbaycan XİN rəhbəri Ceyhun Bayramovun Moskvaya səfəri və rusiyalı həmkarı Serqey Lavrovla ölkələrimiz arası münasibətlərin inkişafına və Cənubi Qafqaz regionunda sülh yaradılmasına dair müzakirələrin aparılması, o cümlədən nazirliklər arasında 2023-2024-cü illər üçün siyasi məsləhətləşmələr planı imzalanması ölkələrimiz arası münasibətlərin möhkəmlənməsi töhfə verəcək. Azərbaycan Rusiya əlaqələri yüksələn xətlə inkişaf edir. Azərbaycanın Rusiyanın regionları ilə əməkdaşlığı günü-gündən genişlənməkdədir. Son illər ölkələrimiz arası ticarət dövriyyəsi sürətlə artmaqda davam edir. Rusiya Azərbaycanın qeyri-neft məhsullarını ən çox ixrac etdiyi ölkədir. Hesab edirəm ki, gələcəkdə də ölkələrimiz arası münasibətlər daha da genişlənəcək və iqtisadi münasibətlərin genişlənməsinə töhfə verəcək yeni potensiallardan istifadə olunacaqdır”.
Söhbət zamanı Azər Badamov Moskva görüşü zamanı danışılan digər mövzulara da toxunub. Onun fikrincə, bu səfər Azərbaycan Ermənistan münasibətlərinin normallaşmasına mövcud manelərin aradan qaldırılması baxımından da əhəmiyyətli olacaq.
“ XİN başçılarının görüşü zamanı müzakirə olunan əsas mövzulardan biri də Azərbaycan Ermənistan arasında münasibətlərin normallaşmasına və Zəngəzur dəhlizinin açılmasına dair səylərin davam etdirilməsi ilə bağlı olub. Ceyhun Bayramov xüsusilə qeyd edərək bildirib ki, Azərbaycan 44 günlük Vətən müharibəsindən sonra Ermənistana düşmənçilik səhifəsinin bağlanmasının təklif etdiyini və münasibətlərin nizamlanmasına maraqlı olduğunu bir daha bildirib. O cümlədən Ceyhun Bayramov Qarabağda yerləşdirilmiş sülməramlıların məramsız fəaliyyətləri və Rusiya Müdfiə Nazirliyinin ikili oyun oynadığını da rusiyalı həmkarının diqqətinə çatdırıb. Hesab edirəm ki, XİN başçısı Ceyhun Bayramovun Moskvaya səfəri ölkələrimiz arası əməkdaşlığın möhkəmlənməsi və o cümlədən Azərbaycan Ermənistan münasibətlərinin normallaşmasına mövcud manelərin aradan qaldırılması baxımından əhəmiyyətli olacaq”.
Əbülfət Baxşəli