Müharibələr insanın təkcə canını almır, həm də gələcək həyatlarını işğal edir. Bu gün Laçın-Şuşa yolunda toplaşan Azərbaycan insanı yalnız bir şey istəyir: rahat və sülh şəraitində yaşamaq! Rus sülhməramlılarının və onların arxasında dayanan qüvvə isə bunun əksini istəyir: xaos, gərginlik və konfiliktin aktiv qalmasını.
Aksiyada iştirak etməyi çox istərdim, amma təəssüf ki, manitorun arxasından izləyirəm hər şeyi. Oradakı adamların həyəcanı, ümidi, üsyanı paytaxta qədər çatır, duyulur. Ermənilər və onların havadarları doğma torpaqlarımızı qeyd-şərtsiz, yazılı, imzalı formada tanımır, tanımaq da istəmir. Onların sülhə, barışa yaxın duran həmlələri görünmür. Müxtəlif bəhanələrlə, boş vədlərlə başımızı aldatmaq istəyirlər. Çifayda! Artıq bıçaq sümüyə dirənib. Qarabağ məsələsi tamamilə həll olunmalı, insanlar orada həyatın qaynarlığını, istiliyini bərpa etməlidir.
44 günlük müharibədə ermənilər məğlub olan tərəf idi, xeyli də itki verdilər. Di gəl ağılları başlarına gəlmir. Belə getsə daha da itki verməyə davam edəcəklər. İmzalanan bəyannamə, sülh müqaviləsi məsələsi, hətta Prezident İlham Əliyevin təklifi: ermənilər Azərbaycan vətəndaşı kimi ərazimizdə yaşaya bilərlər, bizim qanunlarla. Daha bundan artıq nə olsun?!
Qərb yönümlü Paşinyan və komandası isə hələ də nələrinsə axtarışında, kimlərinsə kölgəsinə sığınmaqdadırlar. Azərbaycanla sülh sazişi imzalamaq əvəzinə, danışıqları imitasiya etməklə məşğuldur. Hər cür təxribata əl atır, barışa yaxın durmurlar. Ancaq bunlar əbəs cəhdlərdir. Gec-tez ədalət yerini tapacaq!
Erməni hökuməti məğlub olduqlarını yaxşı bilirlər, ona görə də ölkədə kim varsa Qarabağa göndərirlər. Artıq onlar üçün fərq eləmir. Qoca, yaxud yeniyetmə. Özlərinə də erməni qartalları deyirlər. Ancaq bu qocalar qart toyuğa daha çox bənzəyirlər. Baxanda adamın gülməyi tutur. Biri var, sanki, ibtidai icma quruluşdan çıxıb gəlib. Hələ bir foto da çəkdirir və üzünə təbəssüm qondurur. Deyir, sonda gülən yaxşı gülər. Hakimiyyət nəfəs ala bilən hər kəsi orduya səfərbər edir. Ölülər ordusu, yaxud zombi ordusu da deyə bilərik. Sosial şəbəkələrdə uşaqlara belə silah verdiklərini gördük. Ermənistan elə bil ölüm maşınına çevirilib.
Bu cür insanların səfərbər edilməsi, cinayətdir əslində. Çünki hərbi xidmət üçün sağlamlıq vacibdir. Xəstə adamı hərbi xidmətə, üstəlik döyüşə aparmaq nə deməkdir? Bu hansı ağlın məhsuludur?
Kapitulyant, təxribatçı Ermənistan hakimiyyəti anlamalıdırlar ki, bütün siyasi qüvvələr, hətta qanunsuz fəaliyyət göstərən erməni terror dəstəsi süquta uğrayacaq. Onlar bu reallığı erkən idrak etsələr, ən azı Qarabağda məskunlaşmış, həyatları havadan asılı qalan erməni vətəndaşları üçün yaxşı olardı. Yoxsa ki, Paşinyanın sülh hoqqabazlığı, yalan çıxışları Azərbaycanı, Türkiyəni, hətta Avropa İttifaqını və ABŞ-da diksindirib. Paşinyan tezliklə qərar verməlidir! Azərbaycanın isə gözləməyə, səbr etməyə artıq vaxtı qalmayıb.
Qayıdaq aksiyaya. Üç gündür ki, etirazçılar Laçın dəhlizinə yerləşib. Gecə-gündüz yatmır, Qarabağ deyə, Volkov deyə hayqırır. Mənə elə gəlir ki, proseses növbəti Qarabağ müharibəsini yetişdirir. Ümid edirəm, hər şeyi sülh həll edəcək!
Oğuz Ayvaz
