İsrail TANAP və TAP qaz boru kəmərləri vasitəsilə Avropaya qaz ixrac etməyi düşünür.
Ednews xəbər verir ki, bu sözləri İsrailin Azərbaycandakı səfiri Con Dirk jurnalistlərə açıqlaması zamanı bildirib. Onun sözlərinə görə, İsraildə formalaşdırılan yeni hökumətin enerji strategiyasında digər enerji dəhlizləri ilə yanaşı Xəzər qazını Türkiyə və Avropaya daşıyan TANAP və TAP boru kəmərləri əsas yer tutur.
Məsələ ilə bağlı Ednews-a açıqlamasında Neft Araşdırmaları Mərkəzinin sədri İlham Şaban bildirib ki, TANAP və TAP enerji layihələri İsrail qazının Avropa bazarına nəql edilməsində əhəmiyyətli rol oynaya bilər.
“2010-ci ildə İsrail Şərqi Aralıq dənizində öz şelfində qaz yatağı kəşf edib. Lakin həmin ildən bəri öz qazını xarici bazara çıxara bilmir. İsrail öz qazının Avropa bazarına çıxarılması üçün bir sıra vasitələr axtarır, bir çox imkanları nəzərdən keçirir. TANAP və TAP boru kəmərləri İsrailin enerji bazarında milyardlar dəyərində gəlir əldə etməsi üçün çox əlverişli və uğurlu vasitə ola bilər. Bunun üçün ilk növbədə Şərqi Aralıq dənizinin dibi ilə Türkiyə sərhədinə qaz boru kəməri çəkilməlidir, sonra isə bu kəmər TANAP kəməri ilə birləşdirilməlidir”.
Ekspertin sözlərinə görə, Azərbaycan və Türkiyə İsrail qazının TANAP və TAP boru kəmərləri vasitəsilə nəql olunmasına müsbət münasibət bildirə bilər.
“Üçüncü tərəfin bu enerji layihələrə qatılması Bakı və Ankaranın marağındadır. Bizim enerji siyasətimizdə dost ölkələr ilə enerji əməkdaşlığının gücləndirilməsi mühüm priotetlərdən biri hesab olunur. İsraildən başqa Misir və Şərqi Aralıq dənizinin digər sahilyanı ölkələri də TANAP və TAP enerji layihələrinə qoşula bilər. Bütün bu məsələlər qarşılıqlı enerji əməkdaşlığı çərçivəsində həll olunan məsələlərdir”.
Sonda İlham Şaban bildirib ki, yaxın gələcəkdə İsrail, Türkiyə və Azərbaycan mühüm enerji layihələri üzrə üçtərəfli əməkdaşlıqla bağlı razılığa da gələ bilərlər.
“İsrail və Azərbaycanın bir-birinin enerji layihələrində qarşılıqlı iştirakı üçün geniş imkanlar var. Əgər gələcəkdə şərait yaranarsa, Türkiyə daxil olmaqla hər iki dövlət bir sıra enerji məsələləri üzrə razılışmalara imza atmaları mümkündür”.
Yunis Abdullayev