İran İslam Respublikası Azərbaycanla münasibətlərini yaxşılaşdırmaq marağındadır. Bunun üçün artıq hökümət hərəkətə keçib. Beləki, bu yaxınlarda ölkənin XİN rəhbəri Hüseyn Əmir Abdullahian ölkəsinin Azərbaycandakı səfiri Seyid Abbas Musəvi ilə görüşündə ona münasibətlərin inkişaf etdirilməsi üçün göstəriş verib.
Xatırladaq ki, 44 günlük Vətən müharibəsindən sonra, demək olar ki, son iki il ərzində Azərbaycanla münasibətləri gərgin saxlayan, hətta ölkəmizə qarşı müxtəlif hərbi-siyasi təxribatlar törədən İranın son diplomatik addımları müəyyən mənada təəccüb doğurur.
Məsələ ilə bağlı Ednews-a açıqlamasında politoloq Vüqar Zifəroğlu qeyd edib ki, Azərbaycan və İran arasında münasibətlərin gərgin olmasında əsas səbəbkar birbaşa elə rəsmi Tehranın özüdür.
"İran mediasında anti-Azərbaycan təbliğatlarının aparılmasına, eləcə də İran ordusunun ölkəmizin sərhəd əraziləri yaxınlığında təxribatyönlü hərbi əməliyyatlar keçirməsinə son zamanlar daha çox şahidi olmuşuq. Hətta bu ölkənin televiziya kanallarının birində Laçın rayonu Ermənistan ərazisi kimi qeyd edilmişdir. Bu kimi addımlar hər iki qonşu ölkə arasında mehriban münasibətlərə xələl gətirir. Azərbaycan və İran ortaq dərin tarixi köklərə malikdir, eyni zamanda bu ölkədə 40 milyondan çox azərbaycanlı yaşayır. Ümid edirik ki, İran rəhbərliyi bütün bu faktorları nəzərə alaraq ölkəmizlə bağlı məsələlərdə daha advekat addımlar atacaq”.
Tehranın son addımlarının nə dərəcədə dürüst və düzgün olacağı məsələsinə gəlincə isə politoloq bildirib ki, İran Qafqazda hazırki proseslərə uyğun xarici siyasət yürütməlidir.
“44 günlük müharibədə Ermənistan üzərində qələbə çalan Azərbaycan regionda yeni geosiyasi reallıq yaradıb. Yaxşı olar ki, İran daxil olmaqla bir sıra siyasi güclər bu reallıqları qəbul etsinlər və ona uyğun da addımlar atsınlar. İran rəhbərliyinin Ermənistanla dırnaqarası min illik ortaq tarix bəyanatı, Zəngəzur dəhlizi və Ermənistan ərazisinin qırmızı xətt olması ilə bağlı mesajları qəbul edilməzdir. Torpaqlarımızın erməni işğalı altında olduğu dövrlərdə İranın Araz çayı boyunca bir dəfə də olsun hərbi təlimlərinə şahidi olmamışıq. Tehran bütün bu səhv addımlarını nəzərdən keçirməli və bundan sonra Azərbaycanla münasibətlərdə doğru yanaşmalar irəli sürməldir”.
Vüqar Zifəroğlu Abdullahiyanın son addımında Türkiyə faktorunun olduğunu da bildirib.
“Şübhəsiz ki, Türkiyə siyasi, iqtisadi və hərbi cəhətdən önəmli bir ölkədir. Qardaş ölkə Yaxın Şərq və Cənubi Qafqazda geniş təsir imkanlarına malikdir. Lakin İranın son diplomatik addımlarında təkcə Türkiyə faktoru yox, həmçinin qüdrətli Azərbaycan və 40 milyon Azərbaycan faktorunu da nəzərə almaq lazımdır”.
Yunis Abdullayev