“Avropa Parlamentinin qəbul etdiyi bu qətnamə bir daha onu göstərir ki, beynəlxalq səviyyədə erməni lobbisi ilə əməkdaşlıq edən siyasi qüvvələr hər zaman Azərbaycana və Türkiyəyə qarşı səfərbər olublar. İndi də səfərbərdirlər”.
Bu sözləri Ednews-a açıqlamasında siyasi analitik Tofiq Abbasov Avropa Parlamentinin Qarabağla bağlı Azərbaycana qarşı növbəti qərəzli qətnaməsindən danışarkən deyib.
Tofiq Abbasov həmçinin qeyd edib ki, avropalı parlamentarilər hər zaman olduğu kimi həqiqətləri görməzdən gələrək özlərini lal və kar kimi aparırlar.
“Onlar ölkəmizlə bağlı həqiqətləri görmək, eşitmək istəmirlər. Məqsədyönlü şəkildə erməni yalanlarına uyurlar, onların yedəyində gedərək bizi sıxışdırmağa çalışırlar. Bu, həqiqətən regionda sülh prosesinə vurulan bir zərbədir. Əgər onlar Azərbaycanın mövqeyini daha yaxından izləsəydilər, faktiki olaraq görərdilər ki, Laçın yolunda heç bir blokada yoxdur. Həmçinin avropalı parlamentarilər Azərbaycan rəhbərliyinin dəlillərini və sübutlarını nəzərdən keçirib görməlidirlər ki, ermənilər vəziyyəti gərginləşdirmək üçün Laçın yolu ilə Qarabağa müxtəlif silah-sursat daşıyırlar, özbaşnalıqlar edirlər”.
Avropa Parlamentinin dəfələrlə Azərbaycana qarşı qərəzli mövqe sərgilədiyini deyən Milli Məclisin deputatı Elşad Mirbəşiroğlu isə qeyd edib ki, Avropa parlamentinin deputatları Cənubi Qafqazda hazırki siyasi proseslər, gedişatlar barədə məlumatları, təsəvvürləri yoxdur. Onun sözlərinə görə, avropalı parlamentarilər Azərbaycan ərazisində yaşayan ermənilərin sayını təhrif edirlər.
“Avropa Parlementinin deputatları davranışları ilə sübut edirlər ki, Avropanın mövqeyi təcavüzkar və ağır məğlubiyyətə uğradılan Ermənistanı xilas etməyə yönəlibdir. Praqa görüşündən sonra Avropanın bəzi dairələri Azərbaycanın təşəbbüsü ilə başladılan sülh prosesini əngəlləmək üçün min cür oyundan çıxırlar. Onlar iddia edirdilər ki, Azərbaycanın irəli sürdüyü şərtlər əsasında Ermənistanla münasibətlər normallaşa bilməz. Ən maraqlısı odur ki, onlar yenidən Madrid Prinsiplərini gündəliyə gətirməyə çalışırlar. Avropa Parlamentinin bu misilsiz riyakarlığı və qeyri-obyektiv mövqeyi bütövlükdə özlərinin başqa xalqlara və dövlətlərə sıramaq istədiyi dəyərlərə hörmət etmədiyini görsədir. Hesab edirəm ki, eko-aktivistlərimizin nümayişləri demokratiya uğrunda mübarizədə Avropa üçün də təqdirəlayiq dərs ola bilər. Avropalı rəsmilər bunu mütləq nəzərə almalıdırlar. Eyni zamanda onu da qeyd edim ki, Azərbaycanın iradəsi və əzmi ilə regionda sülh və təhlükəsizliyin bərpa olunması istiqamətində münasib imkanlar yaranıbdır. Avropanın siyasi dairələri nə qədər çalışsalar da, bu imkanları aradan qaldıra bilməyəcəklər”.
Xatırladaq ki, qərəzli qətnamədə Qarabağda 120 min erməninin yaşaması və Laçın dəhlizində Azərbaycanı təmsil edən eko-fəalların Qarabağı Ermənistanla birləşdirən yolu bağlamaqla ermənilərin ərzaq, qida, dərman və yanacaqdan məhrum edilməsi barədə məlumatlar qeyd olunub.
Bununla da yetinməyən Avropa parlamenti hətta Azərbaycanı Qarabağda yaşayan ermənilərin hüquqlarını qorumağa, ermənilərə qarşı ayrı-seçkiliyə son qoymağa, onların orda dinc yaşamasına şərait yaratmağa çağırıb.
Yunis Abdullayev