Avropa İttifaqı Şurasının Prezidenti Şarl Mişel mayın 14-də Brüsseldə Azərbaycan Respublikasının Prezidenti İlham Əliyev və Ermənistan Respublikasının Baş naziri Nikol Paşinyanla keçirilmiş görüşün yekunlarına dair mətbuata verdiyi açıqlamada bir çox məqamlara toxunub.
Humanitar məsələlər barədə danışan Şarl Mişel qarşıdakı həftələr ərzində saxlanılan bir çox məhbusun azad ediləcəyi anonsunu verib. O qeyd edib ki, sadəcə, yolunu azan və qarşı tərəfə keçən əsgərlərin sürətli prosedur vasitəsilə azad olunmalarına dair qarşılıqlı anlaşmanın təmin olunması davam etdirilməlidir.
Avropa İttifaqı Şurasının Prezidentinin açıqlamasını Ednews-a şərh edən hüquqşünas, Daxili İşlər Nazirliyi yanında İctimai Şuranın sədri Əliməmməd Nuriyev bildirib ki, azaraq dövlət sərhədini keçən şəxslər qeyd-şərtsiz öz ölkələrinə qaytarılmalıdır və Azərbaycan daim bu prinsipə əməl edib:
“Hazırda iki hərbçimz Ermənistanda əsirdir. Hava şəraiti ilə əlaqədar yolu azıb Ermənistan tərəfinə keçmişdilər. Azərbaycanda əsir saxlanılan şəxslər isə 44 günlük müharibədə bizə qarşı müharibə cinayəti törədən Ermənistan vətəndaşları və ya muzdlulardır. Əsirlər arasında müharibədən və Üçtərfli bəyanatın imzalanmasından sonra ərazilərimizə keçən diversant qrupların üzvləri də var. Ermənistan tərəfindən hava şəraiti ilə bağlı yolu azıb ərazilərimizə keçən erməni əsgərləri və mülki şəxsləri biz qeyd-şərtsiz geri qaytarmışıq. Şarl Mişel Brüsseldəki bəyanatında bildirib ki, azaraq dövlət sərhədini keçən şəxslər öz ölkələrinə qaytarılacaq. Bu, yaxşı xəbərdir. Ermənilər əsir düşən həmin hərbçilərimizə qarşı cinayət işi qaldırıblar. Ədalətli istintaq aparılsaydı, onlar tutulmayacaqdı. İndi onların oxuduğu ədalətsiz hökm ləğv olunmalıdır”.
.jpg)
Ə.Nuriyev onu da əlavə edib ki, Ermənistan tərəfinin məqsədi hərbçilərimizi Azərbaycanda cəzaçəkmə müəssisələrində cəza çəkən erməni əsirlərlə dəyişməkdir:
“Bu istiqamətdə mübadilə ola bilər, istisna deyil. Amma bu, bütün əsirlərə şamil edilə bilməz. Bütün hallarda sülh müqaviləsi imzalanmalı, sərhədlərin delimitasiya və demarkasiyası aparılmalıdır. Şarl Mişel çıxışı zamanı bir məqam da səsləndirdi – Qarabağda erməni əhalinin taleyi məsələsində beynəlxalq tərəflərin iştirakını nəzərdə tutur. Hesab edirəm ki, bu, yanlışdır. Buna razı olmamalıyıq”.
Törə Zeynal
.jpg)
