“Azərbaycanlılar və ermənilər sülh şəraitində birgə yaşaya, birgə regional inteqrasiya və Cənubi Qafqazda sülh üçün möhkəm zəmin yarada bilərlər”.

Ednews xəbər verir ki, bu fikirləri BAMF-ın xüsusi nümayəndəsi Orxan Amaşov Varşava şəhərində keçirilən “ATƏT-in İnsan Ölçüsü Konfransı”nda səsləndirib. O, qeyd edib ki, ayrı-seçkilik aktı yolverilməzdir.

“Əvvəlcə icazə verin, hörmətlə, əsas məruzəçi İzabella Sarkisyanın çıxışından danışım, o, mənim fikrimcə, üzərində dayanmağa heç bir əsası olmayan iddialarla dolu, rəsmi erməni povestinin təkrarı idi. Hər cür ayrı-seçkilik aktı iyrəncdir və bütün şəraitdə ona qarşı dayanmaq lazımdır. Diqqətimizi əsl ayrı-seçkilik və dözümsüzlük hallarına yönəltməyimiz lazımdır”.

O.Amaşov çıxışı zamanı daha iki məsələyə diqqət çəkib və onların müqayisəli təhlilləri əsasında fikirlərini təqdim edib. İlk məsələ Azərbaycanın Qarabağ bölgəsinin erməni sakinlərinin taleyini əhatə edib.

“Bildiyimiz kimi, Azərbaycanın Qarabağ üzərində “de-fakto” suverenliyini bərpa etdikdən sonra Qarabağ erməniləri son iki həftə ərzində çoxları regionu tərk etmək qərarına gəlib. Qarabağın erməni sakinlərinin etnik təmizləməyə məruz qalması və ya zorla qovulması iddiası həm məsuliyyətsizlik, həm də qeyri-dəqiqdir. Qarabağa çıxışı olan beynəlxalq medianın və BQXK-nın hesabatları göstərir ki, onlar bu icmanın öz evlərini tərk etmələri ilə bağlı heç bir fakta rast gəlməyiblər. BMT-nin regiondakı komandası etnik ermənilərə qarşı heç bir zorakılığın tətbiq edilmədiyini və mülki infrastrukturun toxunulmaz qaldığını bəyan edib. Çox maraqlıdır ki, ermənilərin Qarabağdan kütləvi surətdə çıxarılmasını hay-küylə təbliğ edən erməni siyasətçiləri, ekspertləri və fəalları hazırda eyni gedişləri “etnik təmizləmə” kimi qələmə verənlərdir”.

Jurnalist və siyasi analitik daha sonra ikinci məsələdən bəhs edib. O, Ermənistanda yaşayan azərbaycanlıların deportasiyasından danışıb.

“İkinci məsələ isə 80-ci illərin sonlarında müasir Ermənistanda azərbaycanlıların etnik ayrı-seçkilik zəmnində öz ata-baba yurdlarından kütləvi qovulmasının faciəvi epizodu ilə bağlıdır. Bu, müasir Ermənistanı monoetnik, monoteist bir xalqa çevirən əsl etnik təmizləmə hadisəsi olub. Qarabağdakı ermənilərdən fərqli olaraq, onları heç vaxt geri qayıtmağa həvəsləndirilməyiblər. Əslində, onların mövcudluğu Ermənistanda çoxları tərəfindən arzuolunmaz hesab olunub”.

Daha sonra Amaşov ATƏT – ə konstruktiv tövsiyəsi ilə çıxışa davam edib:

“Mən ATƏT-ə tövsiyə edirəm ki, Azərbaycan və Ermənistan hökumətlərini sıx əməkdaşlıq etməyə və etimad mühiti yaratmağa çağırsınlar. Azərbaycanın Qarabağdakı erməniləri yenidən inteqrasiya etmək cəhdləri təşviq edilməlidir. Bakı və İrəvanın azərbaycanlıların Ermənistandakı öz ata-baba torpaqlarına ləyaqətlə və könüllü qayıtmasına imkan verən dövlətlərarası razılaşma üzərində işləməsi də həyati əhəmiyyət kəsb edir. 
Uzun illər əvvəl Ermənistanın keçmiş prezidenti Robert Köçəryan bədnam bir şəkildə demişdi ki, azərbaycanlılarla ermənilər genetik cəhətdən uyğun gəlmir və bir yerdə yaşaya bilməzlər. Bu, iyrənc irqçiliyin ifrat halı idi. Bu, hal azərbaycanlılar və ermənilərin əvvəllər olduğu kimi dinc yanaşı yaşaya bilməsi faktı ilə qalmayacaq, onlar həm də əməkdaşlıq edib, Cənubi Qafqazda regional inteqrasiya və sülh üçün möhkəm zəmin yarada bilərlər”,- deyə o, fikrini tamamlayıb".

Xatırladaq ki, 10 günlük konfrans ATƏT – in nəzdində insan hüquqları və azadlıqlarının müzakirələrinə həsr olunub.

Əkbər Novruz