Rusiya ilə Çin arasında ticarət əlaqələri sanksiyalardan sonra dərinləşir

Qərb ölkələri ilə iqtisadi əlaqələri sanksiyalara görə zəifləyən Rusiyanın ticarətində Çinin rolu artır. 

Ednews zdf.de nəşrinə istinadən xəbər verir ki, Rusiyanın Çindən idxalında texnoloji məhsullar və avtomobil kimi sənaye məhsulları ön plana çıxarkən, Çinin Rusiyadan idxalında enerji üstünlük təşkil edir.

Çin gömrük məlumatlarından toplanan məlumata görə, iki ölkə arasında ticarət həcmi bu ilin ilk 8 ayında keçən ilin eyni dövrü ilə müqayisədə 32 faiz artaraq 155 milyard dollara çatıb.

Sözügedən dövrdə Çinin Rusiyaya ixracı 63,2 faiz artaraq 71,8 milyard dollar, Çinin Rusiyadan idxalı isə 13,3 faiz artaraq 83,3 milyard dollar olub.

Putin və Xi , Yeni İnkişaf Bankı (NDB) daxil olmaqla, BRICS vasitəsilə Dünya Bankı və Beynəlxalq Valyuta Fonduna (BVF) alternativ maliyyə institutları və sistemləri yaratmaq səylərində tərəfdaşlıq etməklə yanaşı, milli valyutalarda ticarəti artırmağa çalışırlar .

Dünyanın ikinci ən böyük iqtisadiyyatına sahib olan Çin, artan bazarı və əhəmiyyətli əhalisi ilə xüsusilə enerji ixracında Rusiyanın prioritet marşrutuna çevrilib.

İllik gücü 38 milyard kubmetr olan “Sibirin Gücü” boru kəməri ilə təbii qazın nəqlinə dair 30 illik müqavilə Rusiya və Çin arasında 2014-cü ildə imzalanıb və xəttin 2025-ci ilə qədər tam gücünə çatması gözlənilir.

Enerji resursları Rusiyanın Çinə ümumi ixracatında 80 faiz paya malikdir.

Xəyal Ramiz