Xəbər verdiyimiz kimi, NATO-nun Baş katibi Yens Stoltenberq Azərbaycana rəsmi səfərə gəlib.
Ednews xəbər verir ki, səfərlə bağlı fikirlərini bildirən politoloq Elxan Şahinoğlu deyib ki, Azərbaycan NATO-nun ikinci böyük dövləti – Türkiyə ilə strateji müttəfiqdir, bu, alyans üçün mühüm amildir.
Ekspert NATO rəhbərinin region ölkələrinə səfərinə diqqət çəkib:
“NATO baş katibi Yens Stoltenberqin gələn həftə Cənubi Qafqaz ölkələrinə başlayacaq səfərinin Moskvada qıcıq yaradacağı indidən bəllidir. Kreml alyans rəhbərinin Azərbaycan, Gürcüstan və Ermənistana səfərlərinin məqsədini özü üçün aydınlaşdırmağa çalışır. Stoltenberqin bölgəyə səfəri yekun hesabat üçündür. Onun baş katib kimi müddəti oktyabrda bitir. Buna görə də, Stoltenberq müxtəlif ölkələrə səfərlər edərək işini uğurla yekunlaşdırmağa çalışır.
Hazırda NATO baş katibinin gündəlik fəaliyyətinin böyük hissəsini Ukrayanadakı müharibə əhatə edir. Ancaq Stoltenberq NATO-nun tərəfdaşları ilə təmasları da arxa plana atmır. Bunun da təxminən Ukraynadakı müharibə ilə əlaqəsi var.Cənubi Qafqaz ölkələrindən yalnız Gürcüstan Şimali Atlantika Blokuna üzv olmaq istəyir, digər iki dövlət – Azərbaycanın və Ermənistanın oxşar məqsədi yoxdur. Əlbəttə, NATO baş katibi İrəvanda Ermənistanın Rusiyadan nə qədər uzaqlaşmağa hazır olması və KTMT-ni tərk etməsi prosesi ilə maraqlanacaq. Ancaq NATO-nun Ermənistana təhlükəsizlik təminatına yönəlik alternativ proqramı yoxdur.
Azərbaycana gəlincə, ölkəmizlə NATO arasında konstruktiv əməkdaşlıq var. Azərbaycan Şimali Atlantika Blokunun müxtəlif proqramlarında iştirak edir. Azərbaycan NATO-nun ikinci böyük dövləti – Türkiyə ilə strateji müttəfiqdir. Azərbaycan ordusu Türkiyə ordusu modelinə keçib. Bu, elə Azərbaycan ordusunda NATO standartlarının tətbiqidir. Bu, Şimali Atlantika Bloku üçün yetərlidir”.
Oğuz
