Avropa Şurasının Yerli və Regional Hakimiyyətlər Konqresi (AŞ) Ermənistanda Qarabağdan olan "qaçqınları" qəbul edən bələdiyyələrə dəstək üçün qrant proqramına start verib. Məlumata görə, Avropa Şurasının İrəvan ofisinin səhifəsində bildirilir ki, proqramın ümumi büdcəsi 100,000 avro təşkil edir və bu, hər bir bələdiyyə üçün 25,000 avroluq 4 qrant şəklində ayrılacaq.
Mövzu ilə bağlı Beynəlxalq Avrasiya Mətbuat Fondunun prezidenti Umud Mirzəyev Ednews – a şərhində bu qərarın Avropanın ali strukturlarında erməni lobbiçiliyinin bariz nümunəsi olduğunu söyləyib.
“Qaçqın və hər hansı bir səbəbdən məcburi köçkün düşmüş şəxslərə qrant ayrılması dünya praktikasında mövcud olan bir məsələdir. Ermənistan anti – terror tədbirlərindən sonra, seperatçı qüvvələrin təşkilatçılığı ilə Azərbaycanın Qarabağ ərazisində yaşayan ermənilər, ərazini tərk etdilər. Burada qeyd edilməli fakt odur ki, onlar heç bir təhdid, təhqir, zor tətbiqi olmadığı təqdirdə, ölkəni tərk etdilər. Bütün bu proses könüllülük prinsipi çərçivəsində həyata keçdi. Günümüzdə isə onlar bu hadisəni böyük qətiyyətlə prosesi təbliğ etməyə, beynəlxalq ictimaiyyətin diqqətini cəlb etməyə çalışırlar. Beləliklə onlar həmin Avropa Şurasında lobbiçilik qüvvələrinin vasitəsilə müəyyən qrant alınmasına nail olublar, lakin olsun, köçkün və qaçqın düşməyin nə olduğunu biz çox yaxşı bilirik".
U. Mirzəyev vurğulayıb ki, Avropa strukturları 30 ildə qaçqınlarımıza bir dəfə də olsun bu diqqəti göstərmədi:
“Azərbaycan torpaqları 30 il işğalda qaldı, 1 milyondan çox qaçqınımız, köçkünümüz oldu. Ermənilərdən fərqli olaraq isə bizə müraciət edən, əl uzadan, bu cür qurumlardan qrant ayıran belə olmadı. Biz həmin ərazilərdən təhqir edilərək çıxarıldıq. Avropa strukturları 30 ildə qaçqınlarımıza bir dəfə də olsun bu diqqəti göstərmədi. Həmin etnik erməni xalqı isə Azərbaycan xalqından fərqli olaraq avtobuslarda, öz minik avtomobillərində, rahatlıqla öz dəyərli əşyalarını daşıyaraq ərazini tərk ediblər. Baxmayaraq ki, Azərbaycan Respublikasının rəhbərliyi ərazini tərk edən mülki xalqa dəfələrlə ölkə vətəndaşı olaraq yaşaya biləcəklərini bildirib. Hesab edirəm ki, irəli sürülən qrant layihəsi Azərbaycanda böyük bir təşviş yaratmamalıdır. Bu bizim üçün təəccüb doğurmur. Avropa strukturları Azərbaycanın haqlı mübarizəsinə hər zaman ikili standartlarla yanaşıblar. Çox təəssüf ki, Avropanın bir sıra ali qurumları xristian təşəbbüskeşliyini ifadə edirlər. Halbuki bu qurumlar hər zaman haqdan, ədalətdən, hüquqdan, qanunun aliliyindən danışa da, əməli işə gələndə biz onlardan ədalətsiz yanaşmalarını gördük”.
Əkbər Novruz