UNEC-də Azərbaycanda ilk dəfə olaraq magistrların beynəlxalq elmi konfransı keçiriləcək.
31 may-2 iyun 2019-cu il tarixlərində Bakıda baş tutacaq “İqtisadiyyat və idarəetmə ixtisaslarında təhsil alan magistrantların” beynəlxalq elmi konfransında Almaniya, Böyük Britaniya, İtaliya, Polşa, Macarıstan və dünyanın bir sıra digər ali təhsil müəssisələrinin magistr pilləsində təhsil alan tələbələri iştirak edəcək. UNEC-in Beynəlxaq Magistratura və Doktorantura Mərkəzinin təşkilatçılığı, ICLEL beynəlxalq konfransının dəstəyi ilə baş tutacaq tədbirin məqsədi, ölkəmizdə elmin inkişafına xüsusilə də elmi tədqiqatların ön plana çıxdığı magistratura pilləsində təhsil alan gənclərin öz tədqiqatlarını təqdim etməsi üçün beynəlxalq platformanın yaradılmasıdır.
Konfransda iqtisadiyyat və idarəetmə ixtisaslarında həm yerli, həm də xarici ölkələrdə təhsil alan gənclər bir araya gətirilərək multidisiplinar tədqiqatların inkişafına töhfələr verəcək, magistr tədqiqatlarının nəticələrini bölüşəcək, tədqiqatların keyfiyyətinin artırılması üçün fikir mübadiləsi aparacaqlar. Konfransa azərbaycan, ingilis, türk və rus dillərində qəbul olunan məqalələr ICLEL–in rəsmi internet səhifəsində beynəlxalq ISSN nömrəli formatda elektron qaydada yerləşdiriləcəkdir. Bu isə dünyanın müxtəlif ölkələrindən olan tədqiqatçı gənclərin konfransın nəticələrindən faydalana bilməsini təmin edəcəkdir. Konfrans vasitəsilə magistr tələbələrinin dissertasiya müdafiəsinə icazə verilməsi ilə beynəlxalq konfrans və ya jurnallarda yayım şərti qoyulan təhsil qurumlarına qəbul olunmuş məruzələr haqqında qəbulla bağlı məktub da veriləcəkdir. UNEC-in Beynəlxaq Magistratura və Doktorantura Mərkəzi gələcəkdə bu konfransın ənənəvi olaraq hər il keçirilməsini planlaşdırır.
Məruzələrin tam mətnlərinin göndərilməsi üçün son tarix - 01.05.2019;
Qəbul olunmuş məruzələrin elanı -10.05.2019;
Konfransda iştirak üçün son qeydiyyat tarixi - 15.05.2019;
Konfrans proqramının elanı - 20.05.2019;
Konfransın keçirilmə tarixləri - 31.05.2019-02.06.2019;
Məruzələrin elektron olaraq göndəriləcəyi email:
Konfransın saytı: www.iclel.com / www.unec.edu.az
Ətraflı məlumat üçün: +994124407159 / +994124406632;
Ünvan: Bakı şəhəri Abbas Səhhət küçəsi 45 A, UNEC-IV tədris binası-Beynəlxalq Magistratura və Doktorantura Mərkəzi -302 nömrəli otaq.