Müxtəlif dini mənsubiyyətlərdən olan ilahiyyatçılar NASA-nın himayəsi altında insanların yerdən kənar sivilizasiyalarla əlaqə qurduqları təqdirdə onlara necə reaksiya verəcəyi ilə bağlı araşdırmaya qoşulublar. Eyni zamanda məlum olub ki, müxtəlif konfessiyaların inanclıları ateistlərlə müqayisədə yad bir təfəkkürlə bu cür əlaqəyə daha çox hazır ola bilərlər.
EDNews.net Moderator.az-a istinadən bildirir ki, bu barədə “Insider” nəşri yazır. İnsanlar yadplanetlilərin aşkarlanmasına necə reaksiya verəcəklər? Nəşr yazır ki, bunu öyrənmək üçün NASA-nın himayəsi altında müxtəlif dini konfessiyaların onlarla nümayəndəsi araşdırmalara cəlb edilib. NASA tərəfindən maliyyələşdirilən bu proqram müxtəlif dünya dinlərinin ardıcıllarının planetimizdən kənarda yeni həyat formalarının kəşfini necə qəbul edəcəklərinə həsr olunub. Nəticədə ekspertlər belə qənaətə gəliblər ki, dindar insanlar planetlərarası əlaqələrə daha çox hazırdırlar.
Tədqiqat 2016-2017-ci illər ərzində Prinston Universitetinin İlahiyyat Tədqiqatları Mərkəzində müxtəlif dinlərə mənsub 24 ekspert və ilahiyyatçının iştirakı ilə aparılıb. Bu mərkəzin rəhbəri Uill Storrarın dediyi kimi, NASA müxtəlif sirli və sehrli hadisələrə, o cümlədən digər planetlərdə canlı mikroorqanizmlərin aşkarlanmasının ehtimal olunan nəticələrinə həsr olunmuş “ciddi elmi tədqiqatların” aparılmasına böyük maraq göstərib.
NASA nümayəndəsi jurnalistlərə müsahibəsində izah edib ki, bu agentliyin himayəsi altında astrobioloji proqram çərçivəsində İlahiyyat Araşdırmaları Mərkəzinə 2015-2017-ci illər arasında qrant şəklində 1,1 milyon dollar maliyyə vəsaiti ayrılıb. Bununla belə, məqalədə bildirilir ki, NASA tədqiqatda iştirak etmək üçün namizədlərin seçilməsində iştirak etməyib.
Proqrama qatılan din alimlərindən biri, Kembric Universitetindən Dr. Endryu Devison daha əvvəl verdiyi müsahibədə şəxsən bu ekzistensial sualları araşdıran 24 ekspertdən biri olduğunu açıqlamışdı. Devison ilk növbədə astrobiologiya və xristianlıq arasındakı əlaqə ilə maraqlanır. Proqramın bir hissəsi olaraq, o, həmkarları ilə birlikdə dünyanın əsas dinlərinin ardıcıllarının yadplanetlilərin kəşf olunmasına necə reaksiya verə biləcəyini araşdırıb.
Devison gələn il nəşr olunacaq “Astrobiologiya və xristian doktrinası kitabında bildirir ki, kainat haqqında mövcud biliklərimizin sərhədlərini genişləndirən hər hansı yeni məlumat aşkar edilərsə, "çox sayda insan öz dini ənənələrinə müraciət edəcək". O, həmçinin bu fikirdədir ki, dünya ictimaiyyəti yerdənkənar həyatın sübutu tapılarsa, möminlərin qarşılaşa biləcəyi problemləri "həddən artıq qiymətləndirməyə" meyllidir.
Devisonun fikrincə, onların tədqiqatlarının əsas nəticələri ondan ibarətdir ki, bir çox dini cərəyanların tərəfdarları bu yeni elmi kəşfləri qəbul etməyə hazır olacaqlar. Üstəlik, araşdırma göstərib ki, dindarlar bu cür hadisələrə daha çox hazır olacaqlar və indi yadplanetlilər öz varlıqlarını açıq-aşkar bəyan etsələr, heç bir dini cərəyana aid olmayan insanlar dində cavab axtarmağa başlaya bilərlər, - deyə məqalədə bildirilir.
Digər dini məsələlər üzrə ekspertlər, o cümlədən ravvin, imam və anglikan kilsəsinin rahibi Devisonun fikrini dəstəkləyiblər. Onlar həmçinin təxmin edirlər ki, yerdənkənar şüur aşkar olunsa belə, insanlar öz dini inanclarına sadiq qalmağa davam edəcəklər. “Mümkündür ki, yadplanetlilərlə təmas yaxın onillikdə baş verə bilər - lakin bunun yalnız növbəti əsrdə baş verməsi və ya heç vaxt baş verməməsi də mümkündür. Bununla belə, insanların bu baş verəcəyi təqdirdə bütün nəticələri əvvəlcədən düşünməsində fayda var”, - deyə Devison kitabında çağırış edir.
