Azərbaycan Respublikası Ədliyyə Nazirliyi və Paşa Bankın tərəfdaşlığı ilə notariat əsaslı vətəndaşın eyniliyinin təsdiq edilmə sisteminin onlayn bankda tətbiqi layihəsinin təqdimatı ilə bağlı mətbuat konfransı keçirilib.
Yerli və tanınmış media nümayəndələrinin dəvət olunduğu, Bakı şəhəri, "Four Seasons" otelində keçirilən tədbirdə Paşa Bankın Texnologiya blokunun baş direktoru Vüsal Xəlilov, Azərbaycan Rəspublikası Ədliyyə Nazirliyində İnformasiya-Kommunikasiya Texnologiyaları idarəsinin rəisi Ağakərim Səmədzadə, Paşa Bankın Hüquq şöbəsinin rəhbəri İlham Hüseynov və bir neçə digər tanınmış qurumun nümayəndələri iştirak edib.
Tədbiri giriş sözu ilə açan Texnologiya blokunun baş direktoru Vüsal Xəlilov qeyd edib ki, son illərə nəzər yetirsək artıq bank sistemində müştərilərin rahatlığını təmin etmek üçün rəqəmsal sistemə inteqrasiya olunur: “Bu bir növ müştərilərin həyat keyfiyyətini yüksəldir, həm də işin faydasını artırır. Bu gün bankların bu sistemə inteqrasiyasında zərurət var. Bu həm də iki faktordan asılıdır: Biirincisi bu texnologiyanın dünyada geniş yayılması; ikincisi isə bu sistemə əlçatanlığın mümkünlüyüdür.
Burada həm də əsas amili də qeyd etmək istərdim. Bu təkcə texnologiya ilə bağlı deyil. Burada müştərilərin üzləşdiyi çətinliklər və buna uyğun bank sisteminin müştəri istəklərinə uyğun dəyişməsidir. Bu gün artıq hətta yaşlı nəsil rəqəmsal sistemdən istifadə edərək faydalana bilir.
Beləliklə müştərilərimiz xüsusi notariat təsdiqləmələrini onlayn formada həyata keçirə bilər. Biz gələcəkdə bu sistemi bankımızın fərqli seqmentlərində də tətbiq etmək istəyirik.
Qeyd edim ki, biz bu sistemi çox qısa zamanda formalaşdıra bildik. Burada Ədliyyə Nazirliyinin də dəstəyi müstəsnadır”.
Ədliyyə Nazirliyindən Ağakərim Səmədzadə qeyd edib ki, dövlət başçısının xüsusi fərmanı ilə artıq rəqəmsal sistemdə təkmilləşdirmə üçün xüsusi diqqət ayrılıb: “Vətəndaşların notariat rəsmiləşdirmələrində bu yeniliyin tətbiqi artıq bir növ vətəndaşla rəsmi idarə arasında əvvəlki münasibətləri keçmişdə qoymuş oldu. Artıq bu gün vətəndaş evindən belə çıxmadan, istənilən notarial sənədini onlayn təsdiqlədə bilər. Bununla həm də ölkədən çıxış üçün razılıq ərizəsi, avtomobillərin rəsmiləşdirilməsi və s. mühüm sənədlərin təsdiqi üçün mobil tətbiqi vasitəsilə rəsmiləşdirilməsi mümkündür. Bunun üçün biz ilk addımı Paşa Bankın peşəkar həyatı ilə birgə atdıq”.
Onun sözlərinə görə, xidmət zamanı vətəndaşlar həm də video müraciətlər edə biləcək: “Belə ki, sənədlərin təqdim olunması zamanı müştəri banka müraciət edir və bank ondan lazımi sənədləri toplayaraq müraciəti aidiyyatı orqana yönəldir”.
Paşa Bankın hüquq şöbəsinin rəhbəri İlham Hüseynov bildirib ki, bu sistem həqiqətən müştərilərin həyatını rahatlaşdırır: “Bu uzun zamandan bəri düşünülüb və bu gün zərurətdən dolayı bu sistemin istifadəsi reallaşdırılıb.
Hazırda bankçılıq sahəsində başqa funksiyaların da rəqəmsal sistemə transformasiyası düşünülür. Bu barədə Mərkəzi Bankla birgə iş aparılır. Hesab edirəm, qarşıdakı illərdə daha yeni sistem müştərilərin xidmətinə veriləcək”.
Qeyd edək ki, tədbir zamanı yerni formalaşdırılan xidmətin funksiyaları ilə bağlı jurnalistlərin də sualları cavablandırılıb. Digər bankların da bu sistemə qoşulması ilə bağlı verilən suala Paşa Bank və Ədliyyə Nazirliyinin nümayəndələri belə cavb verib: "Hazırda bu sistemdən müştərilərin faydalanması üçün onların Paşa Bank müştərisi olması şərtdir. Çünki ilkin addım olaraq yeni rəqəmsal xidməti, Ədliyyə Nazirliyi Paşa Bankla birgə həyata keçirir," deyə, Vüsal Xəlilov belə deyib.
Həmçinin, Ağakərim Səmədzadə gələcəkdə bu sistemin digər banklarla da həyata keçirməsi barədə düşünüldüyünü vurğulayıb: “Bu ilk təcrübədir və effektivlik nəzərə alınmaqla təcrubə başqa banklarla da eynən tətbiq olunacaq”.
Elnur Ənvəroğlu
Foto: Fariz Faiqoğlu
