Xəbər veridiyimiz kimi Bakı Tikiş Evinin önündə valideynlərin məktəb geyimlərini əldə etmək üçün izdihamı olmuşdu.
Daha öncə təhsil nazirliyinin keçirdiyi brifinqdə nazir Emin Əmrullayev bildirmişdi ki, şagirdlərə yeni məktəbli formalarının alınması məcburi deyil. Əgər Təhsil Nazirliyi məktəbli formaların vacib olmadığını nəzərə çatdırırsa, bəs nə üçün BTE-nin qarşısında belə böyük izdihamlar yaşanır?
Məsələ ilə bağlı Təhsil Eksperti Kamran Əsədov Ednews-a açıqlamasında bildirib ki, bizim dövlət məktəblərimizdə 1.6 milyon şagird təhsil alır. Təhsilin əsasını planlaşdırma və proqnozlaşdırma təşkil edir. Hazırda məktəbli formaları ilə bağlı problem onu göstərir ki, bizim təhsili idarə edənlərin düzgün planlaşdırılması birmənalı şəkildə yoxdur.
“Başa düşməli idilər ki, məktəbli formaları vacib problem olaraq ortaya çıxacaqdı. Şagirdlərin məktəblərə yeni formalarla getməyi mütləq şəkildə olmasa da nəzərə alaq ki, bu il 1-ci sinifə 158 min şagird təhsil alacaq. Onların yeni məktəbli forması ilə gəlməsi əsasdır. Azərbaycanda məktəbli formalarından istifadə 2009-cu ildə Təhsil haqqında qanun qəbul olunandan sonra həyata keçirilməyə başlayıb. 2011-ci ildən ölkə üzrə məktəblərdə məktəbli formaları tətbiq edilib. Tədris ilinin başlamasına bir həftə qalmış Bakı Tikiş Evi tərəfindən istifadəyə verilib. Bu problemi əslində 3 ay əvvəl həll etmək lazım idi. Çünki bu qısa müddət ərzində Bakı Tikiş Evi 1.6 milyon şagirdin hər biri üçün məktəbli formasını hazırlayıb təhvil verə bilməz. Təhsil Nazirliyi də həmişə olduğu kimi məsələdən yaxasını kənara çəkərək canını qurtarmaq istəyir. Amma bu belə deyil. Ola bilər ki, valideynin bu gün aldığı forma növbəti tədris ilində məktəbin pedaqoji şurasının qəbul etdiyi qərar ilə fərqli forma rəngi olsun. Bu təbii ki, valideynlərə əlavə maliyyə yükünə salacaq ciddi bir problemdir”.
K.Əsədov sonda bunları bildirib:
Tədris prossesində müəyyən məsələlər var ki, orada məcburi yanaşma tətbiq olunmalıdır. Biz bilməliyik ki, məktəbli formalarının dizaynı, forması rəngi məktəb rəhbərliyi tərəfindən seçilir. Hesab edirəm ki, BTE-nin önündəki izdiham onu göstərir ki, yeni tədris ilinin başlanmasında müvafiq qurum öz öhdəliyini yerinə yetirə bilmir. Bu tədris ilinin gedişatında da öz mənfi təsirini göstərəcək. Çünki Təhsil nazirliyi hər nə qədər məcburi deyil desə də, amma məktəb direktorları məcbur edir ki, məktəb formaları ilə gəlmək lazımdır. Bu da onu göstərir ki , təhsili idarə edən qurumla onun idarə etdiyi qurum arasında ciddi fikir ayrılığı var. Ona görə də tədris ilinin başlamasına 3 ay qalmış bu problem öz həllini tapmalı idi”.