Texnologiya həyatımıza sürətli şəkildə daxil olmaqla yanaşı müəyyən problemləri də özü ilə gətirib. Ən əsası həyatımızın ayrılmaz hissəsi olan, saatlarımızı oğrulayan sosial şəbəkə bizi özümüzdən uzaqlaşdırır. Müasir dünyada insanlar xoşbəxt olmağa yox, daha çox onun görüntüsünü nümayiş etdirməyə üstünlük verirlər.
“Ördək sindromu” nədir?
Bu barədə ilk dəfə Standford Universitetində tədqiqatçılar fikir irəli sürərək, sosial şəbəkələrdə
“ördək sindromu” adlı diaqnoz təyin ediblər. Yəqin, hər kəs ördəyin su üzərində necə rahat hərəkət etdiyini müşahidə edib. Suyun altında ayaqları ilə necə əziyyət çəkdiyini isə bircə ördəyin özü bilir.
Bu, eynilə sosial medianın əks etdirdiyi "xoşbəxt” insanları, həyatları, hətta ikili münasibətləri xatırladır. Gəlin, bir nümunəyə nəzər salaq.
Məsələn, bir cütlük özəl bir günü qeyd etmək üçün restorana getməyi qərarlaşdırır. Hər yer tıxac, bütün restoranlar doludur. Bu məqamda həyat yoldaşı əsəbləşir və “mütləq bu gün deyil, başqa gün də çıxa bilərdik” deyə qadını danlayır. Qadın isə özəl gündə onu danlamasına əsəbiləşir, əhvali-ruhiyyələr pozulur və əsəbi şəkildə evə dönürlər. Tək yaddan çıxmayan şey isə gülümsəyərək selfi çəkib sosial şəbəkədə paylaşmaq olur.
Günün sonunda isə bəzilərinə saxtalıqla dolu bu həyatlara baxıb “Xalxın uşağı kef eləyir” demək düşür. Beləliklə, sosial şəbəkədə “xoşbəxt görüntü” fotolarıyla rəqabətə girirlər. Kimisi “like” xəstəliyinə tutulur, kimisi #qonşudangeriqalma həştəqini həyat fəlsəfəsinə çevirdi. Təəssüflər olsun ki, artıq bu xəstəlik halına çevrilib və insanlar bundan əziyyət çəkirlər.
Budur sosial medianın illuziyası. Orada xoşbəxt görünmək üçün çox böyük səy göstərilir. Amma ekran arxasındakı çətinliklərin heç biri görünmür. Gəlin, bu sindromun qurbanları olmayaq.
Mehri Ağayeva