Birləşmiş Millətlər Təşkilatının Qaçqınlar üzrə Ali Komissarlığının (BMT QAK) Azərbaycandakı nümayəndəsi Furio De Angelis Beynəlxalq Avrasiya Mətbuat Fondunda (BAMF) olub. BAMF-ın prezidenti Umud Mirzəyevlə görüşən qonaq Fond və BMT QAK arasındakı gələcək əməkdaşlıq imkanlarını müzakirə edib.
Hər iki struktur - BAMF və BMT QAK qaçqın və məcburi köçkünlərlə iş sahəsində kifayət qədər təcrübəyə malikdir. 1992-ci ildə əsası qoyulandan bəri BAMF-ın məşğul olduğu 4 əsas sahədən biri qaçqın və məcburi köçkünlərin problemləridir. Bu sahədə əldə olunan təcrübə BAMF və BMT QAK-ın müxtəlif layihələrdə uğurlu əməkdaşlığına rəvac verə bilər.
BAMF-ın gördüyü işin əhəmiyyətini vurğulayan Furio De Angelis, BMT QAK-ın Fondla bir çox istiqamətlərdə əməkdaşlığını genişləndirmək niyyətində olduğunu bildirib.
İrəli sürülən mühüm ideyalardan biri də hər ilin iyulun 20-də qeyd olunan Ümumdünya Qaçqınlar Gününün təşkili ilə bağlıəməkdaşlıqdır. Hər iki strukturun belə bir əlamətdar və unudulmaz tədbirin təşkil edilməsində təcrübəsi var.
Qeyd edək ki, bu, BMT QAK rəhbərinin BAMF-ın ofisinə ikinci gəlişidir. Bu dəfəki görüşdə BMT QAK-ın Proqram üzrə əməkdaşı Migena Teyn və BMT QAK-ın sahə məsələləri üzrə baş məsləhətçisi Elsevər Ağayev də iştirak edirdilər.
Migena Teyn BMT QAK-ın Bakıdakı ofisinin dəstəyilə fəaliyyət göstərən Qaçqın Qadınlar və Gənclər Mərkəzinin gördüyü işlər barədə də danışdı.
Görüşün sonunda BAMF prezidenti Umud Mirzəyev BMT QAK-ın Azərbaycandakı nümayəndəsi Furio De Angelisə ofisə gəldiyi üçün təşəkkür edib və BAMF-ın BMT-nin bu ali təşkilatı ilə ilə müxtəlif sahələrdə əməkdaşlığa hazır olduğunu bildirib.