Bu gün Beynəlxalq Avrasiya Mətbuat Fondunun  (BAMF) prezidenti Umud Mirzəyev Birləşmiş Ərəb Əmirliyinin “Al Bayan” qəzetinin mədəniyyət və əyləncə bölməsinin rəhbəri Hüseyn Daroviçlə görüşüb.

"Ərəb dilli “Al Bayan” qəzetinin əsasını 1980-ci ildə Dubay rəhbərliyi qoyub.

Hüseyn Daroviç mədəniyyət sahəsində tanınmış yazıçıdır, onun yeddi kitabı dərc olunub, daha iki kitabının da nəşr olunacağı gözlənilir. O, 1992-ci ildə poeziya sahəsində hər il verilən mükafatla təltif olunub.

Umud Mirzəyev qonağa Fondun əsas fəaliyyət istiqamətləri barədə məlumat verib. 1992-ci ildə yarandığı gündən bəri BAMF ölkə sərhədlərindən kənarda  fəaliyyət dairəsini genişləndirib və dünyanın müxtəlif ölkələrində geniş partnyor şəbəkəsinə malikdir.

Azərbaycana turist kimi gələn Hüseyn Daroviç BAMF-ın təsis etdiyi beynəlxalq analitik-informasiya portallarından biri olan "Eurasia Diary"-ə baş çəkmək istəyib.

U. Mirzəyev məlumat verib ki, sayt 5 dildə - ərəb, ingilis, rus, Azərbaycan və türk dillərində fəaliyyət göstərir.

“Al Bayan” qəzetinin redaktoru qeyd edib ki, ərəb dünyasında əsas turizm istiqamətlərindən biri sayılan Azərbaycan üçün media mühüm rol oynayır.

Görüş zamanı “Al Bayan” qəzeti və Eurasia Diary arasında əməkdaşlıq imkanları müzakirə edilib.

Tərəflər uzunmüddətli, qarşılıqlı fayda verə biləcək əməkdaşlığın qurulması barədə razılığa gəliblər.