Sumqayıt şəhərindəki 9 saylı tam orta məktəbin direktoru Bəhruz Səlimxanov 9-11-ci siniflərdə oxuyan 20-dən çox şagirddən pul alaraq onların dərsə yox, repetitor yanına getməsinə şərait yaradır.
Bu iddia ilə məktəbdə tərbiyə işləri üzrə direktor müavini olan İlkin Əliyev çıxış edib.
Onun sözlərinə görə, direktorun rüşvət alma faktlarını tədris üzrə müavin Faiq Bayramovla birlikdə aşkarlayıb: “Biz direktorun şagirdləri sinifdən-sinfə keçirmək üçün valideynlərdən 50 manat pul istəməsi faktını aşkarladıq. Bu cür qanunsuzluq etdiyini özünə bildirdikdə isə hər ikimizi işdən uzaqlaşdırıdı. Bizim əmrimiz Pedaqoji Şurada müzakirə edilmədən verildi”.
İlkin Əliyev deyib ki, sentyabr ayında valideynlərdən biri direktorun təmir, fəxri fərman verilməsi, tez-tez summativ testlər keçirməsi, eləcə də övladı oxuyan sinifdə təmayüllü siniflər yaradılmasında nöqsanlarla bağlı nazirliyə şikayət edib:
“Halbuki həmin təmayüllü sinifdə 2 şagird dərsə gəlmir. Şikaytdən sonra nazirlikdən 2 müfəttiş məktəbə gəlib yoxlama apardı, bildirdi ki, ciddi tədbir görüləcək. Bu yaxınlarda da Faiq müəllimlə mən şagirdlərin məktəbə davamiyyətini araşdırdıq. 20-dən çox şagirdin məktəbə gəlmədiyi faktı üzə çıxdı.
Bundan sonra direktor Faiq müəllimi şərləmə metoduna əl altdı. Məktəbdə çalışan qadın müəllimələri öyrətdi ki, guya Faiq müəllimin onlara sataşıb. Prokrorluğa şikayət olundu.
Həmçinin dərsə gəlməyən valideynin biri direktor tərəfindən öyrədilərək Faiq müəllimə təhqiramiz sözlər dedi. Hazırda iş araşdırılır. Direktorun əmrində göstərilib ki, işimizi məsuliyyətli görmürük. Əmək kitabçalarımız bizə bir neçə gün əvvəl verilib. Halbuki həmin kitabça işdə qalmalıdır. Çünki vəzifədən azad olunsaq da, dərs saatımız qalır. Faiq müəllimi şərləyən Samirə Cəfərovaya direktor həm 36 saat rus dili, həm də ədəbiyyat dərsi yazıb. Halbuki həmin müəllim çox vaxt dərsə girmir. Azərbaycan ədəbiyyat müəllimlərinin də az dərs saaatları var”.
İlkin Əliyev qeyd edib ki, işdən azad olunandan sonra Sumqayıt Şəhər Təhsil şöbəsinin rəhbəri Nizami Namazovun qəbulunda olub: “Hansı səbəbdən işdən uzaqlaşdırıldığımı soruşdum. Bildirdi ki, məktəbdə ümumi tərbiyə pozulub, rəhbərlik işdən azad olunmalıdır. Təhsil şöbəsindən bizə bildirdilər ki, direktorun ərizəsi alınıb, amma əmri verilməyib”.
Məsələ ilə bağlı məktəbin direktoru Bəhruz Səlimxanov açıqlamasında bildirib ki, səslənən itthamların heç bir əsası yoxdur: “Faiq Bayramov müəllimlərə sataşdığı üçün işdən azad edilib. Mənə qarşı səsləndirdikləri fikirlər əsassızdır”.
Sumqayıt Şəhər Təhsil Şöbəsindən bildirilib ki, 9 nömrəli tam orta məktəbin direktoru Bəhruz Səlimxanov işində yol verdiyi nöqsanlara görə işdən azad edilib. (Teleqraf.com)