Rusiya xarici işlər naziri Sergey Lavrov Azərbaycana səfəri çərçivəsində ADA Universitetində interaktiv dialoq keçirib. Eurasia Diary xəbər verir ki, tədbirdə Azərbaycan XİN-nin nümayəndələri, QHT nümayəndələri, ziyalılar, müstəqil ekspertlər, jurnalistlər eləcə də, Diplomatik Akademiyanın müəllim, tələbə və məzunları iştirak edib.

“Dünyanın siyasi-iqtisadi təsir mərkəzləri regionun onlara aid hissələrində stabilliyin qorunmasındakı məsuliyyəti inamlı şəkildə öz üzərlərinə götürür“, deyə S. Lavrov bildirib.

Onun sözlərinə görə, obyektiv şəkildə formalaşan yeni dünya nizamının hüquqi prinsiplərə söykənməsi çox önəmlidir. O qeyd edib ki, yeni mərkəzlər ümumi problemlərin BRICS, ŞƏT, KTMT, MDB, AİB və digər beynəlxalq təşkilatlar çərçivəsində həllini dəstəkləyir.

“Diplomatların yeni nəsli Rusiya-Azərbaycan dostluğunun prinsiplərinə əsaslanan ikitərəfli əməkdaşlığın gələcəkdə də inkişaf etdirilməsi üzərində çalışmalı olacaq“, deyə diplomat qeyd edib.

Bundan əlavə, Rusiya XİN rəhbərinin səfəri  iki ölkə arasındakı diplomatik münasibətərin 25 illiyinin qeyd edilməsi ərəfəsinə təsadüf edir.

Xatırladaq ki, bugün Sergey Lavrov Bakıda azərbaycanlı həmkarı Elmar Məmmədyarovla görüşəcək. Danışıqlarda əsas müzakirə mövzusu qarşılıqlı maraq doğuran məsələlər və Dağlıq-Qarabağ münaqişəsinin nizamlanmasının perspektivləridir.

Qonşu dövlətlər – Azərbaycan və Rusiya arasında ikitərəfli əlaqələr strateji tərəfdaşlıq xarakteri daşıyır.

Qeyd edək ki, bu il Azərbaycan və Rusiya arasında diplomatik münasibətlərin qurulmasının 25 illiyi ilə əlaqədar olaraq xüsusi əhəmiyyət daşıyır.