Prezident İlham Əliyevin 2018-ci ilin Azərbaycanda Cümhuriyyət ili elan olunması ilə bağlı göstərişindən sonra ölkədə bununla bağlı bir sıra təkliflər irəli sürülüb. Belə təkliflərdən birini ötən həftə parlamentin plenar iclasında millət vəkili, Mətbuat Şurasının sədri Əflatun Amaşov dilə gətirdi. Millət vəkili qeyd etdi ki, Azərbaycan Xalq Cümhuriyyəti 2 il müddətində bir çox sahələrə olduğu kimi, mediaya da böyük diqqət ayırdı. Xalq Cümhuriyyətinin mövcud istiqamətdə qarşıya qoyduğu məqsədlərdən biri də nəşriyyət evinin tikilməsi idi. Lakin bu işin həyata keçirilməsi mümkün olmadı. Həmin ideya ötən əsrin 30-cu illərində reallaşdı. 1933-cü ildə Bakıda Mətbuat Sarayı deyilən bina istifadəyə verildi. Həmin bina indiki Azərbaycan prospektində yerləşir. Əflatun Amaşov həmin binanın Mədəniyyət və Turizm Nazirliyinin reyestrində memarlıq abidəsi kimi qeydiyyata alındığını da diqqətə çatdırdı. Onun sözlərinə görə, uzun müddət «Azərnəşr»in fəaliyyət göstərdiyi bu bina 1995-ci ildə «Bank standart»- a baş ofis kimi verilib.
“Binanın özəllikləri kifayət qədərdir. Diqqət yetirmisinizsə, kitab şəklindədir. Daxili strukturunda isə hər detal sırf nəşriyyat-çap işinin həyata keçirilməsinə hesablanıb. İnşaat materiallarının seçilməsindən tutmuş otaqların havalandırılmasınadək, hətta işçilər üçün şəraitə qədər ən kiçik detal nəzərə alınıb. Bununla əlaqədar sənədlərlə tanış olmuşam. Təklifim bundan ibarətdir ki, Mətbuat Sarayı adı ilə inşa edilmiş həmin bina keçmiş sahiblərinə qaytarılsın və çox yaxşı olardı ki, orada mətbuat muzeyi yaradılsın. Düşünürəm ki, bu da Azərbaycan Xalq Cümhuriyyətinin yubileyinə ən böyük hədiyyə olar»-deyə millət vəkili əlavə edib.
Əflatun Amaşovun bu təklifinə ölkənin media mütəxəssisləri də qoşulub. Bakı Dövlət Universitetinin jurnalistika fakültəsinin müəllimi, professor Cahangir Məmmədli Eurasia Diary-yə açıqlamasında Əflatun Amaşovun təklifini yüksək qiymətləndirdiyini bildirdi. “Əflatun Amaşov əslində tarixi fakta toxunub. Çünki, o təklif etdiyi bina vaxtilə Mətbuat Sarayı olub. İndi onun öz statusunu geri qaytarılması gündəmdədir. Jurnalistlərə, jurnalistikamızın tarixinə yaraşan bir yerdədir. Mən iki əlli ona razıyam və mətbuatda bunu hamımız təbliğ etməliyik”.
"525-ci qəzet"in baş redaktoru, Azərbaycan Yazıçılar Birliyinin katibi, Rəşad Məcid də Eurasia Diary-yə bu təkliflə bağlı fikirlərini bildirib. “Əflatun Amaşovun təklifini mən də çox maraqla və xoş qarşıladım. Belə bir muzeyin yaradılmasına ehtiyac var. Həqiqətən də mətbuat muzeyinə yararlı ola biləcək tarixi bir binadır. Əgər elə bir ideya reallaşarsa bu həm də Azərbaycan mətbuatına çox böyük diqqət və qayğının göstəricisi olar”.
"Şərq" qəzetinin baş redaktoru Akif Aşırlı da sözügedən təklifi çox müsbət qiymətləndirdiyini açıqladı. Onun sözlərinə görə Azərbaycanda mətbuat tarixi muzeyinə çox böyük ehtiyac var.
“Mətbuat tarixi muzeyi ilə bağlı müəyyən təşəbbüslər irəli sürülüb. Ancaq parlament səviyyəsində ilk dəfədir belə bir təklif səsləndirilir. Buna qədər müxtəlif səviyyələrdə mətbuat tarixi muzeyinin yaradılması ideyası səsləndirilmişdi. Təvazökarlıqdan uzaq olsa da bu ideyalardan birinin də müəllifi mənəm. Şərq qəzetində artıq 5 otaqda kiçik Azərbaycan tarixi muzeyi fəaliyyət göstərir. 150-yə yaxın eksponat var o muzeydə. Hətta Əkinçidən sonra çap olunan 135 illik tarixi olan “Ziyayi-Qafqaziyyə” qəzetinin orijinal nüsxəsi də muzeydə saxlanılır. “Şərqi-Rus” qəzeti, “Açıq söz” qəzeti və digər mətbuat orqanlarına aid olan nümunələr də var. Mətbuat tariximizin 12-yə yaxın ən böyük şəxsiyyətlərindən hesab olunan jurnalistlərin portretlərini işləyib hazırlamışıq. Bu çox müsbət bir haldır.”
Bütün bunlara baxmayaraq Akif Aşırlı mətbuat tarixi muzeyinin böyük tarixi məkanda açılmasına çox ciddi ehtiyacın olduğunu dedi. “O ehtiyacı da Əflatun müəllim dilə gətirdi. Mən ona təşəkkür edirəm. Hesab edirəm ki, məkan da çox doğrudur. Ora vaxtilə Mətbuat Sarayı olub. Sonradan senzura kimi fəaliyyət göstərib. Hətta 90-cı illərdə orada müəyyən mətbuat orqanları fəaliyyət göstərirdi. Tarixi binadır. O, binada mətbuat tarixi muzeyi yaradılarsa çox böyük bir iş olardı. Mən də üzərimə düşən nə vəzifə varsa onu icra etməyə hazıram”- deyə baş redaktor əlavə edib.
Seva İsgəndərova, EurasiaDiary