Telekanallarda şou-proqramlarda bağlı narahatlıq tək bizdə deyil, bütün dünyada mövcuddur. Çox təəssüf ki, dünyada hər şey şoulaşır.
Bunu APA-ya açıqlamasında Milli Televiziya və Radio Şurasının sədri Nuşirəvan Məhərrəmli bildirib.
N. Məhərrəmli bildirib ki, bu, tək televiziyalara aid məsələ deyil: “Hüquqşünaslar, iqtisadçılar, din xadimləri öz işlərini şoulaşdırırlar. Ümumiyyətlə, cəmiyyətdə elə sahə yoxdur ki, şou ilə bağlı olmasın. Bu, çox təəssüfedici haldır və televiziyada özünü daha çox göstərir. Azərbaycanda özəl telekanallarının əsas gəlir yeri reklamla, sponsorla bağlıdır. Ona görə də telekanallar gəlir əldə etmək, cəmiyyəti verilişlərinə cəlb etmək üçün müxtəlif yollar, orijinallıq axtarırlar. Çox təəssüf ki, bu yollar bəzən çox da uğurlu alınmır”.
MTRŞ sədri hesab edir ki, büdcədən maliyyələşən Azərbaycan Dövlət Televiziyası, Mədəniyyət Televiziyası, İdman Televiziyası, İctimai Televiziya bu işdə əsas yükü öz üzərlərinə götürməlidir: “Bu televiziya kanalları gərək cəmiyyətin tələbatını ödəsin. Əgər insanlar həmin televiziya kanallarında olan verilişlərə baxacaqlarsa, özəl telekanallardakı şou verilişlərinə ehtiyac qalmayacaq. Çox təəssüf ki, cəmiyyətdə dəyərsizləşdirmə çox sürətlə gedir və bu özünü bütün sahələrdə göstərir. Bu, qorxulu tendensiyadır və biz bundan çox əziyyət çəkirik”.
N. Məhərrəmli MTRŞ-nın sosial problemli insanlar üzərində şou yaradılmasını qəbul etmədiyini vurğulayıb: “Kriminal xəbərlərdə insanlarla bağlı cəmiyyəti qıcıqlandıran mövzuların tez-tez təkrar edilməsini qəbul etmirik. Bəzən elə olur ki, ailədə dəhşətli, cəmiyyətimizə xas olmayan hadisə lazım olduğundan artıq işıqlandırılır. Bu, tək televiziyalar deyil, yazılı KİV-də də özünü çox göstərir. Telekanallarda belə məsələlər olan zaman Şura bunu tənzimləyə bilir. Amma bütövlükdə mediada bu hal özünü çox göstərir. Xüsusən əxlaqi dəyərlərlə bağlı kriminal hadisələr, ata-övlad, ər-arvad məsələləri daha çox qabardılır”.
MTRŞ sədri qeyd edib ki, televiziya kanallarında yetərincə maarifləndirici verilişlərin olması üçün iqtisadi baza olmalıdır: “Özəl telekanallarda maarifləndirici verilişlər demək olar ki, yox dərəcəsindədir. Bu özəl telekanalların iqtisadi vəziyyəti həddindən artıq pisdir. Bir müddət əvvəl hətta Azərbaycan prezidenti bəzi özəl telekanallara həm “Azərkosmos”a, həm də "Teleradio" İstehsalat Birliyinə borclarının ödənməsi üçün xüsusi yardım ayırdı. O baxımdan özəl telekanallarda maarifçilik verilişlərinə yer ayrılmaması ciddi problemdir. Bu, həm də reklamın azlığı ilə bağlı olan məsələdir. Ümumilikdə isə telekanallarda problemlər çoxdur. Bura kadr məsələsi, telekanal rəhbərlərinin düzgün proqram siyasətinin olmaması və digərləri daxildir”.
MTRŞ sədri onu da qeyd edib ki, kabel televiziyaları bir xidmət sahəsidir. Bu, abonentlə yayımı təşkil edən arasında olan hüquqi məsələdir və hüquqi cəhətdən tənzimlənməlidir. Milli Televiziya və Radio Şurası isə sadəcə, abonent və kabel yayımını təşkil edənlər üçün normal şərait yaradır. Biz bu şəraiti yaratmışıq:
"Kabel televiziyaları ilə bağlı əhali üçün seçim imkanları çox genişdir. Azərbaycanda 17 kabel şəbəkəsi, 42 İP TV xidməti göstərən var. Bu, böyük bir seçki imkanıdır və insanlar seçim edəcəklər. Yəni hansı kabel şəbəkəsi çox yaxşı xidmət göstərmirsə, digər kabel şəbəkələrinin xidmətlərindən istifadə edəcəklər. Hesab edirəm ki, bu sahədə ciddi bir problem yoxdur. Kabel şəbəkələri də maraqlıdırlar ki, xidmətləri yüksək səviyyədə olsun və əhali onların xidmətlərindən istifadə etsin. Çünki hər bir abonentin ayrılması kabel şəbəkəsi üçün maddi itkidir”.
MTRŞ sədri bütün dünyada olduğu kimi Azərbaycanda da qanunsuz kabel şəbəkəsi yayımı problemi olduğunu qeyd edib:
“İstənilən sahibkar binasında da kabel şəbəkəsi xidməti təşkil edə bilir. Amma mövcud qanunvericiliyə görə, bu sahədə başqalarına xidmət göstərilirsə və vəsait alınırsa, bu, sahibkarlıq fəaliyyətidir. Qanunsuz kabel şəbəkəsi ilə bağlı problemlər çoxdur, amma tək MTRŞ bu problemləri həll etmək iqtidarında deyil. Çünki bu məsələdə əhalinin də, müvafiq dövlət qurumlarının da yardımı lazımdır. Sahibkar öz binasında hansısa kabel şəbəkəsi qurur və orada yaşayan sakinlərə təqdim edir, amma Şuranın bundan xəbəri yoxdur. Nə bundan nə sakinlər, nə də digər orqanlar şikayət edir. Biz bu qanunsuz kabel şəbəkəsi yayımını necə öyrənə bilərik? Biz hər bir binanın qarşısına gedib, qapını döyüb bunu insanlardan soruşmalı deyilik. Təbii ki, bu məsələlərdə cəmiyyət fəal olmalıdır”.
.jpg)
