İTV-nin baş direktoru Cəmil Quliyev mayın 1-də istefa ərizəsi təqdim edib. Yayım Şurasının üzvləri Cəmil müəllimdən bir neçə günlük işinə davam etməsini xahiş edib ki, yeni direktor seçə bilək. O da razılaşıb.
Bu sözləri İctimai Televiziya və Radio Yayımları Şirkətinin Yayım Şurasının üzvü Azər Həsrət İTV-nin yeni baş direktorunun seçimi ətrafında gedən müzakirələrə münasibət bildirərkən deyib.
Onun sözlərinə görə, mayın 11-də Cəmil Quliyevin özünün iştirakı ilə Yayım Şurasında ərizəyə baxılıb: “Onun fikirləri dinlənildi və istəyi təmin edildi. Ancaq xahiş etdik ki, bir neçə gün də vəzifəsini icra etsin, bəzi işləri yekunlaşdırmaq lazımdır. Şuranın iclasında 9 üzvdən 8-i iştirak edib. Çox mehriban bir ortamda müzakirə aparmışıq”.
Yayım Şurasının üzvü qeyd edib ki, mayın 14-də Milli Tеlеviziyа və Rаdiо Şurаsı boşalmış direktor yerinə elan verib və artıq ərizələrin qəbulu üçün imkan yaranıb: “Neçə nəfərin ərizə təqdim etməsi barədə hələlik məndə məlumat yoxdur. Amma onu deyə bilərəm ki, bütün proses “İctmai TV və radio yayımı haqqında” qanunun tələbləri çərçivəsində həyata keçirilir”.
O, yeni direktor seçkiləri ətrafında yaranan anlaşılmazlığa belə reaksiya verib: “Cəmiyyətdə çaşqınlıq yaradan xəbərləri Yayım Şurası yaymayıb və ümumiyyətlə, bizim o informasiyalardan xəbərimiz olmayıb”.
