Bu gün Bakıda, ADA Universitetində Azərbaycan Demokratik Respublikasının 100 illiyinə həsr olunmuş beynəlxalq konfrans keçirilir. Bu barədə Eurasia Diary xəbər verir.
Tədbirdə diplomatik missiyaların rəhbərləri və beynəlxalq təşkilatların nümayəndəlikləri, Azərbaycan Xarici İşlər Nazirliyinin nümayəndələri, Milli Məclisin deputatları, akademiklər, ADA-nın tələbə və müəllim heyəti, vətəndaş cəmiyyətinin nümayəndələri və jurnalistlər iştirak edir.
Tədbiri ADA Universitetininrektoru Hafiz Paşayev açdı. Açılış nitqi ilə çıxış edərkən o sabah keçiriləcək ADA-nın məzunlarının təltif olunma mərasiminin də Azərbaycan Demokratik Respublikasının 100 illik yubileyinə həsr olunacağını vurğuladı. O bildirdi ki, Prezident İlham Əliyev sabahkı təntənəli tədbirdə iştirak edəcək və ADA məzunlarının qarşısında çıxış edəcək.
Rektor həmçinin, universitetin ADR-in 100 illiyi ilə bağlı geniş miqyaslı tədbirlər həyata keçirdiyini söylədi. Beləcə, o tamaşaçılara ADA-nın tələbələrinin yazdığı və universitet tərəfindən nəşr olunmuş kitabı nümayiş etdirdi. Onun sözlərinə görə, tələbələr ADR rəhbərliyinin xaricdə təhsil almağa göndərdiyi və daha sonra vətənə dönən insanların həyat hekayələrini təsvir ediblər. Müəlliflər tərəfindən aparılan tədqiqatların nəticələrinə görə, azərbaycanlılar xaricdən qayıtdıqları zaman gördüklərindən məyus olublar: məlum olduğu kimi, ilk Azərbaycan Respublikasının ömrü uzun sürməyib.
Hafiz Paşayevin sözlərinə görə, ən əsası odur ki, ADR-in qısa ömründən Azərbaycan xalqına miras qaldı. "Birinci respublikanın rəhbərliyi beynəlxalq ictimaiyyətə azərbaycanlıların müstəqilliyə bağlılığını nümayiş etdirdi. Müstəqilliyin yenidən qurulması dövründə bu, Azərbaycana böyük kömək etmişdir".
Konfransda çıxış edən Azərbaycanın xarici işlər naziri Elmar Məmmədyarov qeyd edib ki, Azərbaycan müsəlman dünyasında təkcə qadınlara təhsil almaq və səs vermək hüququ verən ilk ölkə deyil, həm də Şərqdə demokratiyanın qurulduğu ilk ölkədir.
"ADR 1918-ci il mayın 28-də yaradılmışdır. Rusiya İmperiyasının dağılması ilə əlaqədar olan daxili və xarici problemlərə baxmayaraq, respublika dövlət qurumları yaratmağı və ölkənin əhalisinin etibarını qazanmağı bacardı. Demək olar ki, iki il mövcud olan ADR dövlətin, demokratiyanın qurulması və xalqın özünü təyin etməsinin formalaşdırılması üçün aktiv fəaliyyət göstərib.
Biz indi aydın şəkildə dünyanın əsas qüvvələrinin regionun ən güclü oyunçularından biri kimi Azərbaycanla hesablaşdıqlarını müşahidə edirik. Bu bir əsr əvvəl əsası qoyulmuş prinsiplərin qorunması sayəsində mümkün oldu".
Natalya Quliyeva, Eurasia Diary
Foto: Samir Sadıqov
