Beynəlxalq Avrasiya Mətbuat Fondunun (BAMF) prezidenti Umud Mirzəyevlə BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə ofisinin rəhbəri Mələk Çakmak arasında görüş olub.
Görüşdə FAO-nun Azərbaycandakı fəaliyyəti, o cümlədən BAMF və FAO arasında əməkdaşlıq, qabaqcıl beynəlxalq təcrübənin ölkədə tətbiqi və digər məsələlər müzakirə olunub.
Beynəlxalq Avrasiya Mətbuat Fondunun (BAMF) prezidenti Umud Mirzəyev rəhbərlik etdiyi təşkilat haqqında Mələk Çakmaka məlumat verib. Bildirib ki, BAMF 1992-ci ildə təsis edildiyi andan etibarən fəaliyyətini genişləndirərək Azərbaycandan kənarda, dünyanın müxtəlif ölkələrində tərəfdaşlardan ibarət geniş şəbəkəyə malikdir. Fondun prezidenti BAMF-ın 25 il ərzində vətəndaş cəmiyyəti, qaçqın və məcburi köçkünlərlə iş istiqamətində həyata keçirdiyi layihələr barədə məlumat verib. Qeyd edib ki, mətbuat qurumu olaraq obyektiv informasiyanın yayılması da Fondun fəaliyyətinə daxildir. Beynəlxalq strukturlar, BMT agentlikləri, Azərbaycandakı diplomatik missiyalarla əməkdaşlıq edən Fond müxtəlif humanitar layihələr həyata keçirir. Umud Mirzəyev regionda sülhün təmin olunmasının vacibliyini vurğulayıb. O qeyd edib ki, münaqişədən daha çox dinc əhali əziyyət çəkir. Umud Mirzəyev BAMF-ın FAO ilə əməkdaşlıq etməyə hazır olduğunu bildirib. “Bizim Tərtərdə 6 hektar sahəmiz var. Orada tingçililk bazası yaratmaq olar. Bu həm də insanlar üçün yeni iş yerlərinin açılması deməkdir. Bundan başqa, Tərtərdə 54 başlıq ferma təsərrüfatımız da var. Biz FAO ilə uğurlu əməkdaşlıq etməyə hazırıq”-deyə Fondun prezidenti vurğulayıb.
BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə ofisinin rəhbəri Mələk Çakmak rəhbərlik etdiyi ofisin Azərbaycanda reallaşdırdığı layihə və proqramlar barədə məlumat verib, FAO-nun gələcək planlarından danışıb. Ofisin rəhbəri Azərbaycan kənd təsərrüfatında məhsuldarlığın artımı ilə yanaşı, qida təhlükəsizliyinə xüsusi diqqət yetirilməsinin önəmini vurğulayıb. Qeyd edib ki, FAO-nun Azərbaycanla əməkdaşlıq müqaviləsi var və bu müqaviləyə uyğun olaraq çox yaxında 3 layihənin icrasına başlanılacaq.