Azərbaycanın Özbəkistandakı səfirliyinin nəzdində yerləşən Heydər Əliyev adına Azərbaycan Mədəniyyət Mərkəzinin təşkilatçılığı ölkəmizdə səfərdə olan tanınmış özbək KİV nümayəndələri millət vəkili Qənirə Paşayeva ilə görüşüblər.
Deputat görüşdə Azərbaycanın Özbəkistanla əlaqələrin və əməkdaşlığın inkişafına böyük önəm verdiyini vurğulayıb. O bildirib ki, Özbəkistan və Azərbaycan jurnalistlərinin qarşılıqlı səfərləri çox zəruridir:
“Bu istiqamətdə gözəl layihələr həyata keçirən Heydər Əliyev adına Azərbaycan Mədəniyyət Mərkəzinə təşəkkür edirəm. Özbəkistanda Azərbaycanın, Azərbaycanda Özbəkistanın daha geniş təbliğinə böyük ehtiyac var və bu istiqamətdə jurnalistlərin üzərinə böyük missiya düşür”.
Millət vəkili görüşdə işğalçı Ermənistanın Azərbaycan torpaqlarımızda törətdiyi vandalizm aktları və öz evinə dönə bilməyən 1 milyon azərbaycanlı qaçqın və məcburi köçkün barədə ətraflı məlumat verib.
Q.Paşayeva qeyd edib ki, Qarabağ həqiqətlərinin daha geniş yayılmasında Azərbaycanın qardaş Özbəkistanın KİV-lərinin dəstəyinə ehtiyac var.
Özbəkistanın tanınmış KİV rəhbər və təmsilçiləri Azərbaycana, onun tarixinə, böyük mədəniyyətinə, təbiət gözəlliklərinə, mehriban insanlarına heyran qaldıqlarını və burada özlərini öz evlərindəki kimi hiss etdiklərini deyiblər.
Onlar bildiriblər ki, Qarabağ həqiqətlərinin daha da geniş yayılmasında səylərini daha da gücləndirəcəklər.
.jpg)
