Eurasia Diary xəbər verir ki, Bakıya Ümumdünya Turizm Təşkilatının İcraiyyə Komitəsinin 110-cu iclasında iştirak etmək üçün gələn Misirin Turizm naziri ilə mətbuat konfransının təşkil edilməsində əsas məqsəd iki ölkə arasında turizm əlaqələrinin inkişafının təbliğ və təşviqidir.
Xanım nazir Raniya əl-Maşat, ilk növbədə, bir neçə illik fasilədən sonra Misirdən Azərbaycana nazir səviyyəsində olan ilk səfərin baş tutmasından çox şad olduğunu vurğulayıb.
“Sevindirici haldır ki, tarixən qədim əlaqələrə malik Azərbaycan və Misir xalqı arasında oxşarlıq çoxdur. Həmçinin iki ölkə arasında turizm münasibətləri ötən illərlə müqayisədə çox inkişaf edib və turistlərin sayı əhəmiyyətli dərəcədə artıb.”
Nazir qeyd edib ki, Misirin turizm sektoru çox inkişaf edib və ölkə gəlirinin 20%-dən daha artığı turizmin payına düşür. Buna görə də, Misir turizm əlaqələrinin genişdirilməsinə böyük əhəmiyyət verir. Belə ki, 2018-ci ildən turizmin təbliği və təşviqini hədəfləyən yeni bir turizm planı həyata keçirilir. Bu məqsədlə, Azərbaycan və Misir arasında turizm əlaqələrini genişləndirmək üçün Bakı ilə Şarm əl-Şeyx arasında birbaşa uçuşlar təşkil olunacaq. Reyslər “SCAT Airlines” aviaşirkəti tərəfindən Boeing 757-200 təyyarələri vasitəsilə iyulun 18-dən etibarən həyata keçiriləcək. Xanım nazir Raniya əl-Maşat Bakıya uçuşunun 14 saat çəkdiyini deyib. Lakin Bakı ilə Şarm əl-Şeyx arasında birbaşa reyslərlə uçuş zamanı Azərbaycan və Misir arasında səyahət müddətinin 3,5 saat olması nəzərdə tutulub.
Misirin Turizm naziri 2020-ci ildə pramidaların yaxınlığında böyük bir muzeyin açılacağı barədə məlumat verib.
“Muzeydə təxminən 10 min eksponat, o cümlədən firon Tutanhamona aid 5 mindən artıq eksponat nümayiş etdiriləcək. Bu muzeydə turistlərin eksponatlar ilə selfi çəkdirməsinə şərait yaradılacaq. Muzey turistlərin gəliş-gedişinin asanlaşdırılması məqsədilə Sfinks beynəlxalq hava limanı yaxınlığında inşa ediləcək.”
Misir hökuməti tərəfindən turistlərin təhlükəsizliyinin təmin edilməsində bütün lazımi standartlara riayət edildiyini və beynəlxalq ekspertlərin şahidliyi ilə Misirdə sabitliyin olduğunu vurğulayan xanım nazir azərbaycanlıları ölkəsinin turizm imkanları ilə geniş şəkildə tanış etmək istədiyini deyib.
Tədbirin sonunda xanım nazir Raniya əl-Maşat, Azərbaycan xalqına və Misirin ölkəmizdəki səfiri cənab Adel İbrahimə təşəkkürünü bildirib.
Həşim Məmmədov, Təbriz Abbasov
