“Azərbaycan Hava Yolları" Qapalı Səhmdar Cəmiyyətinin Sərnişinlərin, baqajın və yüklərin daşınması qaydaları"na əsasən sərnişinlərin geyimi ilə bağlı hər hansı bir məhdudiyyət və yaxud xüsusi dress-kod nəzərdə tutulmayıb”. Bu barədə qurumdan “Yeni Müsavat”ın sorğusuna cavab olaraq bildirilib.
Xatırladaq ki, bu günlərdə İspaniyada baş verən hadisə dünya mətbuatının diqqətini cəlb etmişdi. Belə ki, ölkənin Malaqa şəhərində açıq-saçıq geyimlə təyyarəyə minən qadın “hava gəmisi”ndən düşürülüb. 31 yaşlı Harriyet Osbornun dərin sinə dekolitesi diqqət çəkib. Bundan başqa, iki uşaq anasının büstqalterdən istifadə etməməsi narahatlıq yaradıb. Bu səbəbdən stüardessa qadını təyyarədən endirib.
Ona bu paltarla təyyarəyə minə bilməyəcəyi deyilib. İngiltərə vətəndaşı olan Harriyet isə bu səbəbdən hava limanında gecəməli olub. O, məsələ ilə bağlı danışaraq stüardessanın addımını pisləyib: “O, bu cür davranışı ilə məni təhqir etdi. Özümü çox ucuz hiss etdim. Polis də nəyə görə təyyarəyə götürülmədiyimi eşidəndə təəccübləndi”.
Qeyd edək ki, İspaniya kimi inkişaf etmiş ölkədə bu cür hadisənin yaşanması təəccüblü qarşılanıb. Lakin yayılan fotolardan da görmək olur ki, adı çəkilən qadın kifayət qədər açıq-saçıq geyimdə təyyarəyə minib. Buna görə onu tənqid edənlərin da sayı kifayət qədər olub.
Təxminən bu ilin mart ayında İngiltərənin Birminhem şəhərində yaşanmışdı. 21 yaşlı Emili Okonnorun təyyarədə yaşadığı biabırçılıq dünya mətbuatının gündəminə düşmüşdü. Belə ki, qadını geyiminə görə təyyarədən endirməklə hədələmişdilər. O, Birminhemdən Tenerifə uçarkən dekoltesinə görə bu hadisə ilə üzləşib. Onu “üstünü örtməsən, səni təyyarədən endirərik” sözü ilə hədələyiblər. Okonnor hava limanında eyni paltarla gəzişib və problemlə üzləşməyib. Onun qohumu pencəyini Emiliyə verib və qadın təyyarəyə minib. Hadisə sosial şəbəkələrdə yayıldıqdan sonra şirkət Emilidən üzr istəyib.
Las-Veqasda da bu cür hal yaşanıb. Bir qadın həddən artıq açıq dekolteli paltar geyindiyinə görə onu təyyarəyə buraxmayıblar. San-Fransisko hava limanında bir sərnişin geyiminə görə təyyarədən çıxarılaraq həbs edilib. Buna səbəb sərnişinin şalvarını beldən aşağı geyməsi olub.
Beləliklə, göründüyü kimi, aviaşirkətlər geyim kodeksi barədə əvvəlcədən məlumat verməsələr də, müəyyən sərhədlər gözlənilir. Məlumata görə, aviaşirkətlər qeyri-etik sayılan qiyafətə görə təyyarədən uzaqlaşdırılan sərnişinin pulunu qaytarırlar.
Qeyd edək ki, Səudiyyə Ərəbistanı rəsmi olaraq belə bir qadağa qoyub. Belə ki, bu ölkəyə məxsus hava yolları şirkətinin qaydalarına görə , “Saudia Airlines" təyyarəsi ilə uçan qadınlar əl və ayaqlarını örtməli, kişilər isə şortik geyinməməlidir.
Bundan başqa, qadınların paltarları çox şəffaf və dar da olmamalıdır. “Saudia Airlines” “dress-kod”a riayət etməyən sərnişinləri göyərtədən endirmək hüququnu özündə saxlayıb.