Azərbaycan İlahiyyat İnstitutunun tələbələri Türkiyəyə “Yay məktəbi”nə yola düşüb | Eurasia Diary - ednews.net

21 Avqust, Çərşənbə


Azərbaycan İlahiyyat İnstitutunun tələbələri Türkiyəyə “Yay məktəbi”nə yola düşüb

Cəmiyyət A- A A+
Azərbaycan İlahiyyat İnstitutunun tələbələri Türkiyənin Bursa şəhərinə “Yay məktəbi”nə yola düşüb.
 
Aİİ rektoru Ceyhun Məmmədov “Yay məktəbi”nə gedən tələbələrlə görüşərək, onlara uğurlar arzulayıb. Tələbələrə öz tövsiyələrini verən C.Məmmədov gənclərin ölkəni və Azərbaycan İlahiyyat İnstitutunu layiqincə təmsil edəcəklərinə ümidvar olduğunu  bildirib. 
 
Rektor tələbələri “Yay məktəbi” müddətində məsuliyyətli olmağa və yaradılan şəraitdən səmərəli faydalanmağa çağırıb. Onlara verilən tapşırıqları vaxtında yerinə yetirməyi və asudə vaxtlarını səmərəli keçirmələrini tövsiyə edib. Gənclərin karyera imkanlarının genişləndirilməsində bilik və bacarığın hər zaman öndə dayandığını söyləyən rektor hər bir gəncin tələbəlik illərindən gələcək karyerası barədə düşünməli olduğunu vurğulayıb. 
 
Daha sonra tələbələr “Yay məktəbi”ndə onlar üçün təşkil edilən proqramın gündəliyi ilə tanış olublar. Qeyd edək ki, gənclərə bu müddət ərzində müxtəlif dərslər keçiləcək, həmçinin asudə vaxtlarının səmərəli təşkili üçün tarixi abidələrə, məscidlərə ziyarətlər təşkil olunacaq.
 
“Yay məktəbi” Azərbaycan İlahiyyat İnstitutu, Türkiyə Cümhuriyyətinin Təhsil  nazirliyi və Dəyanət İşləri Başqanlığı arasında əldə edilmiş razılığa əsasən baş tutacaq.
Məlumat üçün bildirək ki, Azərbaycan İlahiyyat İnstitutu xarici ölkə universitetləri ilə əlaqələrin qurulmasında maraqlıdır. Aİİ ötən bir il ərzində müxtəlif ölkələrin universitetləri ilə, həmçinin Türkiyə, Rusiya, Malaziya ali təhsil müəssisələri ilə əlaqələr yaradıb, Türkiyənin Ankara, İstanbul, Marmara, “29 Mayıs”, Kırıkkale universitetləri ilə əməkdaşlıq protokolları imzalayıb.
 

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...