"Bu gün saat 11 radələrində Koroğlu metro stansiyasının girişində polislər kiçik oğlumu saxlayıb, kobudcasına xəbərdarlıq ediblər ki, burda şəkil çəkmək olmaz, dərhal telefonunu alıb, metroda çəkdiyi şəkilləri siliblər".

Eurasia Diary xəbər verir ki, bunu tanınmış iqtisadçı Qubad İbadoğlu özünün Feysbuk səhifəsində yazıb.

"Oğlumdan soruşuram ki, metroda nə maraqla şəkil çəkmək istəyirdin. Cavabı belə oldu ki, "ata bizim metrolar çox gözəldir, hər tərəf parlaq mərmər göz qamaşdırır, istədim bəzi seçmə şəkillər çəkib, Nyu Yorkdakı dostlarıma göndərəm və göstərəm ki, Bakı metrosu Nyu York metrosundan təmiz və yaraşıqlıdır". Gerçəkdən də Nyu York metrosunu görənlər bilir ki, çox görkəmsiz olan stansiyaların tunellərində hətta siçanlar, mişovullar da gəzirlər. Metro stansiyalarının yaxşı mənada fərqləndiyini göstərmək üçün etdiyi hərəkətinə görə polislərin təzyiqinə məruz qalan oğluma hələ də izah edə bilmədim ki, nədən Bakıda metro stansiyalarında şəkil çəkmək qadağandır", - deyə iqtisadçı ekspert bildirib.

Qubad İbadoğlu qeyd edib ki, sovetdən qalma bu qadağanın mənasını və məqsədini araşdırarkən metropoliteninin rəsmi saytında yalnız belə bir məlumata rast gəlib: "“Bakı Metropoliteni rəhbərliyinin icazəsi olmadan foto, video və kino çəkilişləri aparmaq qadağandır”. Səbəb kimi də strateji obyekt olması göstərilir. Amma bu qadağanın xüsusi olaraq mənim oğluma tətbiq edilməsini də təsadüfi hesab etmirəm".