Bu gün Beynəlxalq Avrasiya Mətbuat Forumunun (BAMF) konfrans zalında Qeyri-Hökumət Təşkilatlarının (QHT) rəhbərlərinin iştirakı ilə Azərbaycanda vətəndaş cəmiyyətinin mövcüd vəziyyəti və qarşıda duran vəzifələrlə bağlı müzakirələr aparılıb. Tədbirdə öncə Ağdam rayonunun işğalının 26-cı ildönümü ilə əlaqədar şəhidlərimizin ruhu birdəqiqəlik sükutla yad edilib.
Eurasia Diary-nin məlumatına görə, BAMF prezidenti Umud Mirzəyev tədbiri açaraq ölkəmizdə vətəndaş cəmiyyətinin inkişafı üçün görülən işlərdən danışıb.
O, qısa çıxışından sonra sözü Azərbaycan Milli Qeyri-Hökumət Təşkilatları Forumunun (MQF) prezidenti Rauf Zeyniyə verib.
MQF-nin 700-dən artıq üzvü olduğunu qeyd edən R.Zeyni bildirib ki, onlar son dövrlərdə vətəndaş cəmiyyətinin, QHT-lərin vəziyyəti ilə bağlı dəfələrlə İdarə Heyətində fərdi şəkildə məsələlər qaldırıblar.
“Biz də, bu ictimai müzakirələrin keçirilməsini planlaşdırdıq. İyulun 10-da bir içtimai müzakirəmiz oldu, bir qisim QHT-lər iştirak etdilər. Əsas müzakirələrimiz də ondan ibarətdir ki, bizim yaranmış bu vəziyyətdən çıxmaq üçün hansı təkliflərimiz var? Təkliflərimiz də ondan ibarətdir ki, qanunvericilik bazası təkmilləşməlidir, QHT-lərə maliyə dəstəyi artırılmalıdır. Eyni zamanda, QHT-lərin maddi texniki bazasının gücləndirilmlidir. Dövlət və özəl sektorda bu sahədə inkişaf gedir. Müqayisə ilə götürəndə bu dəqiqə ən zəif vəziyyət qeyri-hökumət təşkilatlarındadı. Ona görə bu vəziyyəti balanslaşdırmaq üçün, vəziyyəti düzəltmək üçün biz təkliflərimizi hazırlayıb ölkə prezidentinə təqdim etmək istəyirik”.
Qeyd edək ki, tədbirdə iştirak edən QHT rəhbərləri bu və ya digər məsələləri müzakirə etmək üçün ölkə prezidenti ilə vətəndaş cəmiyyəti təmsilçilərinin görüşünü təklif ediblər.
“Biz ölkə prezidenti ilə görüşüməkdə maraqlıyıq. İstəyirik ki, cənab Prezidentlə görüşək və vətəndaş cəmiyyətini, QHT-ləri maraqlandıran, düşündürən məsələləri müzakirə edək. QHT-lər ölkə Prezidetinin dəstəyinə ehtiyac duyur. Çünki cənab Prezident bu illər ərzində mediaya da, gənclər təşkilatlarına da, ziyalılara da, digər sahələrə də çox böyük diqqət, qayğı göstərir. O cümlədən, vətəndaş cəmiyyətinin də inkişafı ilə bağlı 2007-ci ildə qeyri-hökumət təşkilatlarına dövlət dəstəyi konsepsiyası qəbul olundu, 2008-ci ildə Prezident yanında Qeyri-Hökumət Təşkilatlarına Dövlət Dəstəyi Şurası yarandı. Bu, bir mərhələ üçün böyük dəstək oldu. Bilirsiniz ki, 2014-cu ildən sonra qanunda əlavə dəyişikliklər oldu. Bununla əlaqədar da, o vaxtdan başlayaraq milli maraqları, milli dövlətçilik maraqlarını mudafiə edən QHT-lərin maliyyə çətinlikləri oldu. QHT-lərin daimi fəaliyyət göstərməsi üçün il ərzində vəsait olmalıdır ki, orda işçi saxlayasan. Uzun illər fəaliyyət göstərən təşkilatlar qrant imkanlarından məhrum olduqlarına görə fəaliyətini dayandırmaq məcburiyyətindədir. Bu həyəcanlı məsələlərlə əlaqədar olaraq, bu içtimai müzakirəni təşkil etdik”.
Qeyd edək ki, çıxış edən QHT rəhbərləri bu məsələlərdə öz münasibətlərini bildirərək, belə qərara gəldilər ki, vətəndaş cəmiyyətinin inkişafı üçün konkret müraciət hazırlanmalı və o müraciət ölkə Prezidentinə göndəriliməlidir.
Vəfa VƏLİYEVA