Xəbər verdiyimiz kimi, Parlament Jurnalistlər Birliyinin (PJB) üzvləri Milli Mətbuatımızın yaradılmasının 144-cü ildönümü ilə bağlı keçirdiyi toplantıda “Şirməmməd Hüseynov mükafatı”nın təsisi ilə bağlı qərar qəbul ediblər.
Eurasia Diary-nin məlumatına görə, mükafatın Əsasnaməsi yaxın vaxtlarda ictimaiyyətə təqdim olunacaq.
Maraqlıdır, “Şirməmməd Hüseynov mükafatı”nın təsis edilməsi ictimaiyyət necə qarşılayır?
Bakı Dövlət Universitetinin (BDU) Jurnalistika fakültəsinin dekanı Vüqar Zifəroğlu "modern.az"a açıqlamasında mükafatı sevə-sevə qarşıladığını bildirib:
“Dünən “Şirməmməd Hüseynov mükafatı”nın təsis edilməsi barədə xəbəri oxudum. Düzü, çox sevindim. Mükafatın təsis edilməsini yüksək qiymətləndirirəm. Bu, ustad müəllimimizin adının əbədiləşdirilməsi üçün atılan çox yaxşı addımdır. Bu təşəbbüsü ancaq və ancaq alqışlamaq lazımdır. Həmkarlarımıza təşəkkür edirəm ki, belə bir təşəbbüslə çıxış ediblər. Fakültə olaraq bununla bağlı biz də addımlar atacağıq. Şirməmməd müəllimin adının əbədiləşdirilməsi ilə bağlı bizim də bəzi planlarımız var. Fakültə olaraq bizim hər hansı işləri həyata keçirməyimiz normaldır. Şirməmməd müəllim ustadımız, müəllimimizdir. Ancaq jurnalistlərin də bu cür ideya ilə çıxış etməsi çox gözəl bir təşəbbüsdür. Buna görə Elşad Eyvazlıya və həmkarlarımıza təşəkkür edirəm”.