“Mən Mübariz İbrahimovun qəhrəmanlığıni, şücaətini, vətənpərvərliyini hər zaman yüksək dəyərləndirmişəm. Bu gün də, bu fikirdəyəm, gələcəkdə də, bu fikirdə olacam. Bu cür qəhrəman övladlarımız kifayət qədərdir”.
Eurasia Diary xəbər verir ki, bunu Milli Məclisin deputatı, Ana Vətən Partiyasının (AVP) sədri Fəzail Ağamalı həmkarı Qüdrət Həsənquliyevin “Dövlət olaraq müharibə edə bilmiriksə, Mübariz İbrahimov kimi qəhrəmanlarımız şəxsi şücaət göstərməli, düşmənə qan uddurmalıdırlar. Belə qəhrəmanlarımız daha yoxdursa onda ah-nalə edib hökuməti, xalqımımızı qınamamalı, onları yetişdirənə qədər danışıq aparmalıyıq" fikrinə münasibət bildirərkən deyib.
AVP sədri qeyd edib ki, 2016-ci ilin aprel döyüşlərində Azərbaycan ordusunun qəhrəman əsgər və zabitləri böyük şücaət göstərərək “Lələ Təpə” kimi yüksəkliyi ələ keçirdilər və şəhidlik zirvəsinə qədər yüksələ bildilər:
“Bununla bərabər, təbii ki, mən eyni zamanda, Azərbaycan ordusununda yüksək döyüş qabiliyyətini, hərbimizin böyük potensiala malik olduğunu xüsusi olaraq qeyd etmək istəyirəm. Azərbaycan istənilən vaxtda, istənilən şəraitdə, istənilən durumda müharibəyə hazır olan bir orduya malikdir. Bildiyiniz kimi, Azərbaycan yenicə müstəqillik qazanan gənc dövlətlərdən biridir. Hər halda beynəlxalq qüvvələrin qarşısında ciddi dayana biləcək, müqavimət göstərə biləcək imkanlara malik deyil. Çox təəssüf ki, belədir. Ona görə də beynəlxalq qüvvənin işğal olunmuş torpaqlarımızla bağlı təhqir mövqeyi imkan vermir ki, Azərbaycan işğal olunmuş torpaqlarını geri alsın. Lakin mən inanıram ki, yaranmış olan kiçicik bir imkan, kiçik bir pəncərə, şərait dərhal bizim Ali Baş Komandanımızın rəhbərliyi altında torpaqlarımızın azad edilməsinə doğru ciddi addımlar atacaq. Və məncə bu, o qədər də uzaqda deyil”.
Milli Məclisdə Xocalını təmsil edən deputat Elman Məmmədov isə məsələ ilə bağlı qısa danışıb.
“Mən hesab edirəm ki, dövlət olaraq müharibə edəcəyik, torpaqlarımızı işğaldan azad edəcəyik, şəhidlərimizin də qanı yerdə qalmayacaq”, - deyə deputat bildirib.
Vəfa VƏLİYEVA