Avqustun 5-də Goranboyda güclü yanğın hadisəsi baş verib.
Ednews.net xəbər verir ki, Fövqəladə Hallar Nazirliyinin (FHN) yaydığı məlumata görə, Goranboy rayonunun Xan Qərvənd kəndində ümumi sahəsi 210 m² olan tövlənin dam örtüyünün yanar konstruksiyaları 20 m² sahədə, həyətyanı sahəyə yığılan 20 ton ot bağlamasının 10 tonu yanıb. Tövlənin və ot bağlamalarının qalan hissəsi yanğından mühafizə olunub. Yanğın yanğından mühafizə bölmələri tərəfindən söndürülüb.
Qeyd edək ki,saytımıza Xan Qərvənd kəndində baş vermiş yanğının təfərrüatları barədə məlumat daxil olub. Bildirilir ki, yanğına səbəb elektrik naqilinin qırılması olub. Belə ki, əsən güclü külək elektrik naqilini qıraraq yerə salıb və bundan yaranan qığılcım nəticəsində S.Muradovanın həyətyanı sahəsinə aid olan çəpərə od düşüb. Tez bir zamanda külək alovu cəmi 5 metr aralıdakı qonşunun çəpərinə salıb və İsmayıl Bayramova məxsus həyətyanı sahənin çəpəri tamamilə yanıb. Alov buradan ot tayasına və tövləyə keçib. FHN-nin Goranboy rayon yanğından mühafizə bölməsinin yanğınsöndürənləri hadisə yeri gələnədək qonşular alovu söndürməyə çalışsalar da, buna heç cür nail olmayıblar. Yanğından mühafizə bölmələri də yanğını çox çətinliklə söndürə biliblər. Belə ki, yanğını söndürmək üçün əlavə olaraq Tərtər və Bərdə rayonlarından yanğınsöndürən maşınlar çağırılıb və onların səyi nəticəsində yanğın söndürülüb və alovun yaşayış evinə keçməsinin qarşısı alınıb.
Əməkdaşımıza verilən məlumata görə, təxminən bir həftə öncə də Xan Qərvənd kəndinin Eynalxanlı adlanan məhəlləsində məhz həmin yerdə yüksəklikdən keçən elektrik məftili qırılaraq yerə düşüb və yenə də S.Muradovaya məxsus çəpərin bir hissəsini alov bürüyüb. Yanğın yanğınsöndürənlər tərəfindən söndürülüb. Elə həmin gün “Azərişıq”ın Goranboy şöbəsinin işçiləri elektrik naqilini bir-birinə calamaqla işlərini bitmiş hesab ediblər. Və avqustun 5-də əsən külək yenidən məhz həmin yerdən məftili qıraraq yerə salıb və ondan çıxan qığılcım nəticəsində yanğın hadisəsi baş verib. Sakinlərin dediyinə görə, həmin elektrik xətti iri akasiya ağaclarının arasından keçir və küləkli havada naqillər sıxılaraq qırılma baş verir. Onların sözlərinə görə, əgər işıq idarəsi ağaclarda budama işləri aparsaydı, nə məftillər qırılar, nə də bu cür yanğın törənə bilərdi.
Qeyd olunub ki, elektrik xətti bəzi yerlərdə həyətyanı sahələrin çəpər qıraqlarından və ya məhlələrin içərisindən keçir ki, bu da oradakı ağacların iri budaqlarının məftilləri qırmasına gətirib çıxarır. Sakinlər bu cür halların gələcəkdə də baş verməməsi üçün çıxış yolu kimi rayon elektrik idarəsinin işçilərinin iştirakı ilə ağacların budanmasını və bəzi həyətyanı sahələrin içərisindən keçən dirəklərin yerinin dəyişdirilməsində görürlər.
O da bildirilir ki, sözügedən kənddə hər dəfə külək əsərkən işıqlar sönür və sakinlər saatlarla işıqsız qalırlar. Buna səbəb də ağac budalqrının arasından keçən elektrik məftillərinin bir-birinə dəyərək qısaqapanma yaratmasıdır. Kənddə elektrik xətlərinin və dirəklərinin sovet vaxtından qalma olduğu və çox köhnəldiyi də verilən məlumatlar arasındadır.
Sonda onu da qeyd edək ki, baş vermiş yanğın nəticəsində vətəndaş İsmayıl Bayramova 10 min manatdan çox ziyan dəyib.