97 saylı Goranboy-Ağdam-Tərtər seçki dairəsindən Milli Məclisin deputatı, parlamentin İqtisadi siyasət, sənaye və sahibkarlıq komitəsinin sədr müavini Ağalar Vəliyevin təşəbbüsü ilə Qurban bayramı ərəfəsində, avqustun 10-da Goranboy, Ağdam və Tərtər rayonlarının bir sıra yaşayış məntəqələrində deputatın ofisinin nümayəndələrinin seçicilərlə səyyar görüşləri keçirilib.
Eurasia Diary xəbər verir ki, görüşlərdə Prezident İlham Əliyevin rəhbərliyi altında son illər ərzində ölkəmizdə və adı çəkilən rayonlarda uğurla həyata keçirilən dövlət proqramları, infrastruktur layihələri, quruculuq-abadlıq işləri xüsusi vurğulanıb, dövlət başçısının əhalinin və vətəndaşlarımızın sosial müdafiəsinə gücləndirilməsinə yönələn yeni islahatlar paketinin mahiyyəti haqqında seçicilərə ətraflı məlumat verilib.
Səyyar görüşlərdə həmçinin dövlətimizin sosial siyasətinin mərkəzində Azərbaycan vətəndaşının dayanması və bu istiqamətlərdə görülən işlər yüksək dəyərləndirilib, yerli ictimaiyyətin iştırakı ilə Goranboy rayonunundan 410, Tərtər rayonunundan 90 və Ağdam rayonunundan 350, bütövlükdə isə 3 rayon üzrə 850 şəhid, əlil və aztəminatlı ailənin hər birinə millət vəkilinin adından Qurban bayramı münasibətilə təbrik açıqcaları və bütün zəruri ərzaq məhsullarından ibarət təxminən 10 kq civarında bayram sovqatları çatdırılıb.
Seçicilər onlara göstərilən diqqət və qayğıya görə ölkə rəhbərliyinə minnətdarlığını ifadə edib və görüşlərdə bu kimi aksiyaların bundan sonra da mütəmadi olaraq davam etdiriləcəyi bildirilib.