Xəbər verdiyimiz kimi, 14 heyət üzvü olan və ilk səfərinə çıxmağa hazırlaşan flotiliyamızın yeni gəmisi “MAMMAD AMİN RASULZADEh” İstanbulun Dəmir bölgəsində “Doric Warrior” gəmisi tərəfindən vurulub. 

Eurasia Diary-nin məlumatına görə, gəminin sahibi olan “Palmali” şirkətlər qrupunun rəhbəri Mübariz Mənsimov baş verən qəzaya reaksiya verib. O, sosial şəbəkələrdə gəminin vurulması barədə fikirlərini yazıb.

İş adamı facebook səhifəsində bu xəbərə sevinənləri "erməni kökənli heyvanlar" adlandırıb. 

M. Mənsimov instagram səhifəsindəki paylaşımında vurğulayıb ki, “Məmməd Əmin Rəsulzadə” gəmisi dayandığı yerdə digər tanker gəlib ona çırpılıb: “Şükür ki, hər şey normaldır və təhlükəli vəziyyət yoxdur. Qəza anı ilə eyni dəqiqələrdə Türkiyə və Azərbaycanda eyni həriflərin mediasında bu haqda xəbərlər yayıldı. Bu xəbəri anında kim yaydı? Gəmiyə durduğu yerdə çırpmaq bir cinayətdir. Sonuna qədər araşdıracağıq”. 

Mübariz Mənsimov əlavə edib ki, bu xəbərə sevinənlər xainlərdir. “Onu da deyim ki, “Rəsulzadə” gəmisinə çırpılan gəmi ondan on dəfə böyükdür. Ancaq buna baxmayaraq, gəmimiz batmadı”, – iş adamı belə yazıb.