"Dünən axşam saatlarında Goranboyda qazın verilişini bərpa etməyə çalışıblar. Daha sonra məlum olub ki, ağır texnikalar lazımdır. Bu gün, səhər saatlarında həmin yerə Gəncə Regional Qaz İstismar İdarəsi ağır texnika cəlb edib, əlavə borular göndərilib".

Bu barədə Ednews.net-ə açıqlamasında "Azəriqaz"ın mətbuat xidmədinin rəhbəri Ceyhun Səfərov məlumat verib.

Onun sözlərinə görə, gün ərzində işlər görülüb tamamlandığı halda, qaz təchizatı bərpa olunacaq.

"Bu, axşam saatlarına qədər çəkə bilər. Ancaq iş öz qaydasında getsə, tez də tamamlana bilər. Bir qədər sonra, 2 saat  ərzində biz işin gedişatı ilə bağlı fotolar və videolar paylaşacayıq", - deyə C.Səfərov bildirib.

Qeyd edək ki, ötən gün Goranboyda yağan güclü yağış bir sıra fəsadlara yol açıb. Çay keçidinə güclü sel gələrək Veyisli qəsəbəsinə gedən poletilen qaz xəttini 2 hissəyə bölüb. "Azəriqaz"ın mətbuat xidmətindən saytımıza daxil olan məlumata görə, səhər saatlarında qaz təminatında fasilə yaranıb. Lakin günorta saatlarında 2200 abonentin qaz təminatı bərpa olunsa da, qəza baş verən ərazidə sel suları axdığı və ətraf bataqlıq olduğu üçün 790 abonentin qaz təminatını bərpa etmək mümkün olmayıb.

Vəfa Vəliyeva